काठमाडौं(हाम्रो खेलकुद) – आइसिसी विश्वकप लिग टु अन्तर्गतको क्यानडामा जारी त्रिकोणात्मक सिरिजमा नेपालले आफ्नो दोस्रो खेलमा आज ओमानको सामना गर्दैछ ।

क्यानडाको किङ्ग सिटीमा हुने खेल नेपाली समय अनुसार मंगलबार बेलुका ८ः४५ बजे सुरु हुनेछ ।

यो संस्करणको लिग टुमा नेपाल र ओमान पहिलो पटक आमने सामने हुदैछन् । अघिल्लो संस्करणमा ओमानले दोस्रो र नेपालले तेस्रो स्थानमा रहेर लिग टु सकाएका थिए ।

अघिल्लो संस्करणमा नेपाल र ओमान ६ खेलमा आमने सामने हुँदा ४ खेल ओमानले तथा २ खेल नेपालले जितेको थियो ।

ओडिआई क्रिकेटमा भने नेपाल र ओमान ७ पटक आमने सामने हुँदा नेपाल ३ पटक र ओमान ४ पटक विजयी भएका छन् ।

नेपालले ओडिआई इतिहासमा बनाएको सर्वाधिक ३ सय १० रनको योगफल ओमानविरुद्ध नै बनाएको छ । ओमानले जितेको ४ मध्ये लक्ष्य पछ्याउदै २ र पहिले ब्याटिङ गर्दै २ खेल जितेको छ ।

नेपालले ओमानसँग जितेको २ खेल लक्ष्य पछ्याउँदै जितेको छ भने १ खेल पहिले ब्याटिङ गरेर जितेको छ ।

नेपाल र ओमानबीचको पछिल्लो खेल

नेपाल र ओमानबीचको पछिल्लो ओडिआई खेल नेपालमा नै भएको थियो । एसिसी प्रिमियर कपको समूह चरणमा यो खेल भएको थियो । त्यो खेलमा नेपालले ८४ रनको फराकिलो जित हात पारेको थियो ।

नेपालका लागि कुशल मल्लले ५९ बलमा शतक पूरा गर्दै ३ सय १० रनको कीर्तिमानी योगफल तयार गरेको थियो । यो नै नेपालले ओडिआई इतिहासमा बनाएको सर्वाधिक रन हो ।

नेपालले दिएको ३ सय ११ रनको लक्ष्य पछ्याएको ओमान २ सय २६ रनमा अल आउट भएको थियो । ओमानका लागि मोहम्मद नदिमले सर्वाधिक ६५ तथा सन्दीप गौडले ४६ रन बनाएका थिए ।

नेपालका लागि सन्दीप लामिछाने र करण केसीले समान ३ विकेट लिएका थिए । सन्दीपले यसै खेलमा कीर्तिमानी १ सय विकेट पनि पूरा गरेका थिए ।

त्यसअघि टस हारेर ब्याटिङको निम्तो पाएको नेपालले ५० ओभरमा ८ विकेट गुमाएर ३ सय १० रन बनाएको थियो । खराब सुरुवात गरेको नेपालले २८औं बलमा पहिलो रन जोडेको थियो । तर कुशल मल्लको विस्फोटक ब्याटिङको सहयोगमा नेपालले विशाल योगफल तयार गरेको थियो ।

कुशलले ५९ बलमा शतक पूरा गरेका थिए । उनले ६४ बलमा १ सय ८ रन बनाएका थिए । सोमपाल कामीले ४८ बलमा नट आउट ६३ रन बनाएका थिए ।

नेपालले ओमानसँग देश बाहिर अन्तिम पटक अमेरिकामा खेलेको थियो । त्यो खेल नेपालले ७ विकेटले जितेको थियो ।