काठमाडौं (हाम्रो खेलकुद) – आइसीसी क्रिकेट विश्वकप लिग २ अन्तर्गत क्यानडा भ्रमणको पहिलो एकदिवसीय अन्तर्राष्ट्रिय खेलमा नेपाल र क्यानडा भिड्दैछन् ।

टस जितेर पहिलो फिल्ड गर्ने निर्णय लिएको नेपालका लागि तीव्र गतीका बलर गुलसन झाले क्यानडाका ओपनर नवनित धालीवालको विकेट लिएका छन् । धालीवाल ९० बलमा ४८ रन बनाउँदै झाको बलमा कुशल भुर्तेलबाट क्याच आउट हुन पुगे ।

३३औं ओभरको पहिलो बलमा नै ओपनर धालीवाल आउट भएका हुन् । क्यानडाले अहिले ३३औं ओभरमाको समाप्तीमा ३ विकेट गुमाएर १ सय १३ रन बनाएको छ ।

त्यसअघि सन्दीप लामिछानेले नेपाललाई दोस्रो सफलता दिलाएका थिए । सन्दीपले ३५ बलमा १७ रन बनाएर खेलिरहेका प्रगत सिंहलाई एलबिडब्लु आउट गराएका हुन् ।

करिब १३ महिना पछि ओडिआईमा पुनरागमन गरेका सन्दीपले पुनरागमन खेलमा विकेट लिएका हुन् ।

ललितनारायण राजवंशीले नेपाललाई पहिलो सफलता दिलाएका थिए । उनले इनिङमा आफ्नो पहिलो बलमा नै विकेट लिएका थिए । सातौं ओभरमा बलिङका लागि आएका ललितले पहिलो बलमा नै विकेट लिएका थिए ।

ललितले सातौं ओभरको पहिलो बलमा १६ बलमा १२ रन बनाएका ओपनर आरोन जोनसनको विकेट लिए ।