काठमाडौं(हाम्रो खेलकुद) – विश्वकप लिग टु अन्तर्गतको क्यानडामा हुने त्रिकोणात्मक ओडिआई सिरिजको पहिलो खेलमा नेपाल घरेलु टोलीसँग खेल्दैछ ।

नेपाल र क्यानडाबीचको खेल नेपाली समय अनुसार सोमवार बेलुका ७ः४५ बजे क्यानडाको किंग्स सिटी क्रिकेट मैदानमा सुरु हुनेछ ।

त्रिकोणात्मक सिरिजमा नेपाल ,क्यानडा र ओमानको पनि सहभागिता छ । नेपाल र क्यानडाबीच ओडिआईमा हालसम्म ३ पटक भेट भएकोमा तीनै खेल नेपालले जितेको छ ।

नेपाल क्यानडाबीचको यसै वर्षको सुरुमा भएको ३ खेलको ओडिआई सिरिजमा घरेलु टोली नेपालले शतप्रतिशत नतिजा निकालेको थियो ।

यस्तो थियो ३ वटा खेल

पहिलो खेलमा नेपालले ७ रनको जित हात पारेको थियो । त्यो खेलमा नेपालले दिएको २ सय २५ रनको लक्ष्य पछ्याएको क्यानडा ४७.५ ओभरमा २ सय १७ रनमा अल आउट भएको थियो ।

नेपालका लागि कप्तान रोहित पौडेलले ४ तथा ललितनारायण राजवंशीले २ विकेट लिएका थिए । टस जितेर ब्याटिङ गरेको नेपालले निर्धारित ५० ओभरको अन्तिम बलमा अल आउट हुदै २ सय २४ रन जोडेको थियो ।

नेपालका लागि ओपनर कुशल भुर्तेलले सर्वाधिक ६२ तथा आरिफ शेखले ३८ रन बनाएका थिए । क्यानडाका लागि उदय भगवानले ३ तथा ईश्वरजित सोही र साद विन जाफरले समान २ विकेट लिएका थिए ।

सिरिजको दोस्रो खेलमा नेपाल ४ विकेटले विजयी भएको थियो । क्यानडाले दिएको २ सय ८६ रनको लक्ष्य नेपालले ४५.१ ओभरमा ६ विकेट गुमाएर पूरा गरेको थियो । नेपालका लागि कप्तान रोहित पौडेल, देव खनाल र अनिल शाहले अर्धशतक पूरा गरेका थिए ।

रोहितले १ सय १ बलमा सर्वाधिक ८७ रन बनाएका थिए । देवले ८१ बलमा ७६ रन बनाउदा ओपनर अनिलले २० बलमा ५० रन बनाएका थिए । क्यानडाका लागि हर्ष ठाकर र ईश्वरजोत सोहिले समान २ विकेट लिएका थिए ।

त्यसअघि टस जितेर ब्याटिङ रोजेको क्यानडाले निर्धारित ५० ओभरमा ९ विकेट गुमाएर २ सय ८५ रन बनाएको थियो । नेपालका लागि रोहित र कुशल मल्लले समान २ विकेट लिएका थिए ।

तेस्रो भेटमा नेपालले ९ विकेटको सानदार जित हात पारेको थियो । क्यानडाले दिएको २ सय ३३ रनको लक्ष्य नेपालले ४४.३ ओभरमा १ विकेट गुमाएर पूरा गरेको थियो ।

नेपालका लागि अनिल शाह र भीम सार्कीले शतक पूरा गरेका थिए । भीमले १ सय १ र अनिलले नट आउट रहँदै १ सय १२ रन बनाएका थिए ।

क्यानडाका लागि डिलोन हेलिङ्गरले १ विकेट लिएका थिए । त्यसअघि टस हारेर ब्याटिङको निम्तो पाएको क्यानडाले निर्धारित ५० ओभरमा ८ विकेट गुमाएर २ सय ३२ रन बनाएको थियो । नेपालका लागि हेमन्त धामीले ३ तथा कुशल मल्लले २ विकेट लिएका थिए ।

नेपालले क्यानडाविरुद्ध खेलेको तीनै खेलमा शतप्रतिशत नतिजा निकाल्दा २ खेल लक्ष्य पछ्याउदै जितेको छ भने १ खेल पहिले ब्याटिङ गरेर जितेको छ । नेपालले जितेको तीनै खेल घरेलु मैदानमा खेलेको थियो ।

घरेलु मैदानमा त नेपालको नतिजा राम्रो नै छ तर यो खेलमा क्यानडासँगको खेल घर बाहिर हुने हुँदा नेपाललाई केही चुनौती हुन सक्छ । यसअघि नेपालले देश बाहिर १० वटा राष्ट्रमा ३८ खेल खेल्दा १५ खेल मात्र जितेको छ । घरेलु मैदानमा भने नेपालले २६ खेल खेल्दा १८ मा जित तथा ८ मा हार बेहोरेको छ ।

लिग टु अन्तर्गत २०२४ बाट २०२७ सम्म ३६ ओडिआई खेल्ने नेपालले ४ खेल खेलिसक्दा १ मा मात्र जित हात पारेको छ । त्यो एक जित पनि घरेलु मैदानमा आएको थियो ।

नेपालले लिग टुको यस पटकको सिरिजमा पहिलो पटक घरबाहिर खेल्दैछ । सन् २०१९ बाट २०२३ सम्म चलेको अघिल्लो लिग टुमा नेपालले घरबाहिर भएका २४ मध्ये ९ खेलमा जित हात पार्दा १३ खेलमा पराजित भएको थियो ।