काठमाडौं (हाम्रो खेलकुद)– दोस्रो दृष्टिविहिन टि ट्वान्टी विश्व कप क्रिकेट प्रतियोगितामा बुधबार नेपालले अर्को हार बेहोर्ने क्रममा आयोजकलाई १ सय ५२ रनको नतिजा सुम्पेको छ । विश्व कपमा आठ मध्ये एक खेलमा दक्षिण अफ्रिकालाई हराएको नेपाल बाँकी सबै खेलमा पराजित भएको थियो । प्रतियोगितामा नेपालको त्यो सातौं हार हो ।

फाइल फोटो

पहिलो ब्याटिङ गरेको भारतले अजयकुमार रेड्डीको शतकको मद्दतमा १ विकेटको क्षेतिमा २ सय ८९ रन बनाएको थियो । जवाफमा नेपाली टोलीले २० ओभरमा ५ विकेट गुमाएर १ सय ३७ रन मात्र बनाउन सक्यो ।

नेपालका लागि ओपनर रमेशबहादुर बानियाँले सबैभन्दा बढी ३५ रन बनाए । ३६ बल खेलेका रमेशले २ चौका प्रहार गरे । पदमबहादुर बदालियाले २८, विक्रमबहादुर रानाले २४ र सुनिल सुवेदी क्षेत्रीले १२ रन बनाए । अन्यले राम्रो प्रदर्शन गर्न सकेनन् । भारतका लागि अजयकुमार, मोहम्मद जाफरले समान १ विकेट लिए ।

त्यसअघि भारतका लागि अजयकुमारले शतक तथा दुर्गा राव र वेकेटेश्वर राव डीले अर्धशतक पुरा गरे । अजयले ५० बलमा १७ चौकाका साथ १ सय ९ रन बनाए । वेकेटेश्वरले ३३ बलमा ११ चौकासहित अविजित ८२ रन तथा दुर्गाले ३३ बलमा ८ चौका साथ ५३ रन जोडे । अन्य कुनै पनि ब्याट्सम्यानले राम्रो प्रदर्शन गर्न सकेनन् ।

प्रतियोगितामा समान २४ अंक जोड्दै पाकिस्तान पहिलो र भारत दोस्रो स्थानमा छन् । शीर्ष चार भित्र दक्षिण एसियाली राष्ट्र रहेको छन् । १० देशको सहभागिता रहेको प्रतियोगितामा १८ अंकसहित श्रीलंका तेस्रो तथा बंगलादेश १५ अंकसहित चौथो स्थानमा छ । नेपालले अन्तिम खेलमा बिहीबार न्युजिल्यान्डको सामना गर्नेछ ।