चितवन(हाम्रो खेलकुद) – एजुकेशन प्लानेटले सिएमसी कर्पोरेट कप इण्डोर क्रिकेटको उपाधि जितेको छ ।

भरतपुर–३ स्थित क्यासी स्पोर्टस् एण्ड रिक्रियशनल सेन्टरमा सोमवार सम्पन्न रोमाञ्चक फाइनलमा सेन्ट्रल कलेजलाई ८ रनले पराजित गर्दै प्लानेटले उपाधि जितेको हो ।

जितका लागि अन्तिम ओभरमा सेन्ट्रल कलेजलाई २३ रन आवश्यक रहेकोमा १४ रन मात्रै जोड्न सक्यो । उपाधिसंगै प्लानेटले ५० हजार रुपैयाँ प्राप्त गर्‍यो । सेन्ट्रल कलेजले २५ हजार रुपैयाँ पायो ।

विजेता र दोस्रो टोलीका खेलाडीलाई चितवन मेडिकल कलेज (सिएमसी)का निर्देशक दयाराम लम्साल, चितवन जिल्ला क्रिकेट संघ (सिएसी) का सल्लाहकार तथा सेन्ट्रल कलेजका प्रिन्सिपल यज्ञविलास पौडेल, सिएसीका अध्यक्ष सुदिप पियाले पुरस्कृत गरे ।

सिएमसीका निर्देशक लम्सालले सफलता पूर्वक प्रतियोगिता सम्पन्न गरेकोमा सिएसीलाई धन्यवाद ज्ञापन गरे । उनले भविष्यमा पनि क्रिकेट खेलमा सहकार्य गर्दै जाने प्रतिबद्धता व्यक्त गरे ।

सिएसीका सल्लाहकार पौडेलले भविष्यमा प्रतियोगिता आयोजना गर्दा सबैबाट यस्तै सहयोग आवश्यक रहनेमा जोड दिए।

सिएसीका अध्यक्ष पियाले संघले पहिलोपटक यस किसिमको प्रतियोगिता गर्दा सबैको साथ र सहयोगले सफल भएको भन्दै खुसी व्यक्त गरे ।

संघले यो वर्ष वार्षिक क्यालेन्डर नै प्रकाशन स्मरण गर्दै पियाले चितवनमा क्रिकेट गतिविधि बढाउन सिएसी हरदम तयार रहेको बताए । सिएसीका सचिव सुरज ज्ञवालीले सबैलाई धन्यवाद दिए ।

सिएसीको‌ आयोजना र सिएमसीको मुख्य प्रायोजनामा भदौ १४ गतेदेखि १७ गतेसम्म चलेको प्रथम ‘सिएमसी कर्पोरेट कप’ इण्डोर लिग क्रिकेटमा चितवन र नवलपुरका कुल १६ वटा कर्पोरेट टोलीले भाग लिएका थिए ।