एजेन्सी –इङ्ग्ल्यान्डले श्रीलंकाले दोस्रो टेस्टमा पनि हराएको छ । यसका साथ ३ खेलको सिरिज घरेलु टोलीले १ खेल अगावै जितेको छ ।

लन्डनस्थित लर्डसमा आइतवार सम्पन्न दोस्रो टेस्ट इङ्ल्यान्डले १ सय ९० रनको फराकिलो अन्तरले जितेको छ ।

घरेलु टोलीले दिएको ४ सय ८३ रनको लक्ष्य पछ्याएको पाहुना टोलीले अल आउट हुनु अघि २ सय ९२ रन मात्र जोड्न सफल भयो । टोलीका दिमुथ करुणारत्ने, दिनेश चन्डिमल र कप्तान धनन्जय डि सिल्भाले अर्धशतक बनाए पनि टोलीलाई जित दिलाउन सकेनन् ।

चन्डिमलले सर्वाधिक ५८, करुणारत्नेले ५५, कप्तान धनन्जयले ५०, मिलन रत्नायकेले ४३, एन्जेलो म्याथ्युजले ३६ तथा पथुम निशंकाले १४ रन बनाए ।

इङ्ग्ल्यान्डका गस एटकिन्सनले १६ ओभरमा ६२ रन खर्चिएर ५ विकेट लिए । क्रिस वोक्स र ओली स्टोनले समान २ तथा शोयब बसिरले १ विकेट लिए ।

त्यसअघि घरेलु टोलीले पहिलो इनिङमा २ सय ३१ रनको अग्रता बनाएको थियो । दोस्रो इनिङमा घरेलु टोलीले २ सय ५१ रन थप्दै पाहुना टोलीका लागि ४ सय ८३ रनको लक्ष्य दिएको थियो ।
दोस्रो इनिङमा इङ्ग्ल्यान्डका जो रुटले १ सय २१ बलमा १ सय ३ रनको शतकीय पारी खेले । रुटको टेस्ट क्रिकेटमा यो ३४औं शतक थियो । रुट इङ्ल्यान्डका लागि टेस्ट क्रिकेटमा सर्वाधिक शतक बनाउने सुचीको शीर्ष स्थानमा उक्लिएका छन् । यसअघि एलेस्टर कुकले ३३ शतक बनाउँदै यो कीर्तिमानलाई कायम गरेका थिए । कुकले १ सय ६१ खेलमा ३३ शतक बनाएका थिए ।

रुटले १ सय ४५ खेलमा ३४ शतक बनाउँदै कुकको कीर्तिमानलाई तोडेका हुन् । रुटले पहिलो इनिङमा समेत शतक बनाएका थिए । रुटले पहिलो पटक दुवै इनिङमा शतक बनाएका हुन् । टेस्टमा सर्वाधिक शतक बनाउने खेलाडीको शीर्ष स्थानमा भने भारतका सचिन तेन्दुल्कर छन् । सचिनले २ सय खेलमा ५१ शतक बनाएका छन् ।

ह्यारी ब्रुकले ३७, जेमी स्मिथले ३७, बेन डुकेटले ३४ तथा गस एटकिन्सनले १४ रन बनाए । श्रीलंकाका अशिथा फर्नान्डो र लाहिरु कुमाराले समान ३ तथा प्रबात जयसुर्या र मिलन रत्नायकेले समान २ विकेट लिए ।

पहिलो इनिङमा पाहुना टोलीले १ सय ९६ रन मात्र जोड्यो । टोलीका कमिन्डु मेन्डिसले सर्वाधिक ७४ रन जोडे । दिनेश चन्डिमलले २३, एन्जेलो म्याथ्युजले २२, मिलन रत्नायकेले १९ तथा पथुम निशंकाले १२ रन बनाए ।

इङ्ग्ल्यान्डका म्याथ्यु पोट, क्रिस वोक्स, गस एटकिन्सन र ओली स्टोनले समान २ तथा शोयव बसिरले १ विकेट आफ्नो नाममा गरे ।

त्यसअघि टस हारेर ब्याटिङको निम्तो पाएको इङ्ल्यान्डले पहिलो इनिङमा ४ सय २७ रनमा बनाएको थियो । टोलीका लागि गस एटकिन्सन र जो रुटले शतकीय पारी खेलेका थिए ।

पाहुना टोलीका लागि पहिलो इनिङमा अशिथा फर्नान्डोले ५, लाहिरु कुमारा र मिलन रत्नायकेले समान २ तथा प्रबात जयसुर्याले १ विकेट लिए । पहिलो टेस्ट घरेलु टोलीले ५ विकेटले जितेको थियो । तेस्रो तथा अन्तिम टेस्ट शुक्रवार सुरु हुनेछ ।