एजेन्सी – बंगलादेशले ब्याटर लिटन दासको शतकको मद्दतमा पाकिस्तानविरुद्धको दोस्रो टेस्टको पहिलो इनिङमा मध्यम योगफल तयार गरेको छ ।

२ खेलको टेस्ट सिरिजका लागि पाकिस्तानमा रहेको बंगलादेश दोस्रो टेस्टको पहिलो इनिङमा २ सय ६२ रनमा अल आउट भयो । पहिलो इनिङमा घरेलु टोलीले १२ रनको अग्रता लिएको थियो ।

बंगालादेशका दासले २ सय २८ बलमा सर्वाधिक १ सय ३८ रनको शतकीय पारी खेले । बंगलादेश एक समय २६ रन बनाउदा ६ विकेट गुमाएर खराब अबस्थामा पुगेको थियो ।

सातौं विकेटका लागि मेहेदी हसन मिराज र दासले १ सय ६५ रनको महत्वपुर्ण साझेदारी गरेर पाहुना टोलीलाई मध्यम योगफलसम्म पुर्याए ।

मिराजले १ सय २४ बलमा ७८, हसन महमुदले नट आउट १३ तथा शाद्मान इस्लामले १० रन जोडे । अन्य ब्याटरले दोहोरो अंकमा रन बनाउन सकेनन् ।

पाकिस्तानका खुर्रम शाहजादले २१ ओभरमा ९० रन खर्चिएर ६ विकेट लिए । मिर हम्जा र आगा सलमानले समान २ विकेट लिए ।

आज नै दोस्रो इनिङको सुरुवात गरेको घरेलु टोलीले तेस्रो दिनको खेल सकिदा २ विकेट गुमाएर ९ रन जोडेको छ । तेस्रो दिन आइतवारको खेल सकिँदा पाकिस्तानले २१ रनको अग्रतामा छ । वर्षाका कारण पहिलो दिन टस समेत नभई खेल रद्द भएको थियो ।

दोस्रो दिन टस हारेर घरेलु टोलीले ब्याटिङको निम्ता पाएकोमा २ सय ७४ रनमा अल आउट भएको थियो । टोलीका सैयब अबयु, कप्तान शान मक्सुद र आगा सलमानले अर्धशतकीय पारी खेले ।

अबयुले सर्वाधिक ५८, कप्तान मक्सुदले ५७ र सलमानले ५४ रन बनाए । बाबर अजामले ३१, साउद सकिलले १६, खुरम शाहजादले १२ तथा अबार अहमदले ९ रन जोडे ।

बंगालादेशका मिराजले २२.१ ओभरमा ६१ रन खर्चिदै ५ विकेट लिए । तस्किन अहमदले ३ तथा नहिद राना र शकिब अल हसनले समान १ विकेट लिए ।

पहिलो टेस्टमा बंगालादेशले ऐतिहासिक जित हात पारेको थियो ।टेस्ट क्रिकेटको इतिहासमा बंगलादेशले पाकिस्तानलाई पहिलो पटक पराजित गरेको थियो । त्यो खेल बंगलादेशले १० विकेटले जितेको थियो ।