एजेन्सी – अन्तिम खेलमा अमेरिकामाथि जित निकाल्दै नेदरल्यान्ड्सले घरेलु मैदानमा आयोजित त्रिकोणात्मक टि ट्वान्टी सिरिजको उपाधि जितेको छ ।

सिरिजको छैटौं तथा अन्तिम खेलमा बुधवार अमेरिकालाई ४ रनले पराजित गर्दै नेदरल्यान्ड्स घरमा नै उपाधि राख्न सफल भएको हो ।

नेदरल्यान्ड्सले दिएको १ सय ३३ रनको लक्ष्य पछ्याएको अमेरिकाले १९.१ ओभरमा अल आउट हुदै १ सय २८ रन मात्र बनायो ।

अमेरिकाका आन्द्रेस गौसले २६ बलमा ३ चौका र ३ छक्काको सहयोगमा सर्वाधिक ४२ रन जोडे । ओपनर साईतेजा मुकामुल्लाले १६ बलमा २४, आरोन जोन्सले १३ तथा जसदिप सिंहले १२ रन बनाए ।

एक समय ७५ रनमा २ विकेट गुमाउँदै सहज जित तर्फ अमेरिका अघि बढेको थियो । नियमित रुपमा विकेट गुमाउँदा ५३ रन जोड्दा ८ विकेट गुमायो ।

नेदरल्यान्ड्सका लागि आर्यन दत्तले ३, काइल क्लेन र ड्यानियल डोरमले समान २ तथा पल भान मेकरम र म्याक्स ओडाउडले समान १ विकेट लिए ।

त्यसअघि टस जितेर पहिले ब्याटिङ गरेको नेदरल्यान्ड्सले २० ओभरमा ८ विकेट गुमाएर १ सय ३२ रन जोडेको थियो ।

नेदरल्यान्ड्सका लागि रायन क्लेनले २५ बलमा नट आउट रहँदै सर्वाधिक ३६ रन बनाए । ओपनर म्याक्स ओडाउडले २२ बलमा २७, काइल क्लेनले १४ बलमा १६ तथा विक्रमजित सिंहले १० बलमा १४ रन जोडे ।

अमेरिकाका लागि हरमित सिंहले ३, जसदिप सिंहले २ तथा यासिर मोहम्मद र शाड्ली भानले समान १ विकेट लिए ।

नेदरल्यान्ड्सले सिरिजमा खेलेको ४ मध्ये ३ खेल जितेर अंक तालिकाको शीर्ष स्थानमा रहँदै च्याम्पियन भएको हो । नेदरल्यान्ड्स क्यानडासँग पराजित भएको थियो । अमेरिका र क्यानडाले समान १ बराबरी र १ जित हात पारेका छन् ।