एजेन्सी – दक्षिण अफ्रिकाविरुद्धको ३ खेलको टि ट्वान्टी सिरिजमा वेस्ट इन्डिजले क्लिन स्विप गरेको छ । दक्षिण अफ्रिकाविरुद्धको तेस्रो टि ट्वान्टी खेल मंगलवार घरेलु टोलीले जित्दै सिरिज ३-० ले जितेको हो ।

ब्रायन लारा क्रिकेट स्टेडियम ट्रिनिडाडमा भएको खेलमा घरेलु टोलीले ८ विकेटको सहज जित निकालेको हो । दक्षिण अफ्रिकाले १३ ओभरमा १ सय ९ रन बनाएको अवस्थामा भारी बर्षा भएर खेल रोकिएको थियो ।

केही समय रोकिए पछि घरेलु टोलीले जितका लागि १३ ओभरमा १ सय १६ रनको लक्ष्य दिएर खेल फेरी सुरु भएको थियो ।

दक्षिण अफ्रिकाले दिएको १ सय १६ रनको लक्ष्य घरेलु टोलीले ९.२ ओभरमा २ विकेट गुमाएर पूरा गर्यो । घरेलु टोलीको जितमा शाइ होपले २४ बलमा १ चौका र ४ छक्काको सहयोगमा नट आउट रहँदै सर्वाधिक ४२ रन बनाए ।

निकोलस पुरनले १३ बलमा ३५ तथा शिमरन हिटमायरले १७ बलमा नट आउट ३१ रन जोडे । दक्षिण अफ्रिकाका लागि बिजरोन फर्टुन र ओटनिल ब्राटम्यानले समान १ विकेट लिए ।

त्यसअघि टस हारेर पहिले ब्याटिङको पाहुना टोलीले निर्धारित १३ ओभरमा ४ विकेट गुमाएर १ सय ८ रन बनायो । पाहुना टोलीका लागि ट्रिस्टन स्टम्सले १५ बलमा ५ चौका र ३ छक्काको सहयोगमा सर्वाधिक ४० रन जोडे ।

ओपनर रायन रिकल्टनले २४ बलमा २७, कप्तान एडेन मारक्रमले १२ बलमा २० तथा रिजा हेनसरक्सले ९ रन जोडे ।

घरेलु टोलीका लागि रोमारियो शेफर्डले २ तथा अकिल होसेन र म्याथ्यु फोर्डले समान १ विकेट लिए । पहिलो र दोस्रो टि ट्वान्टीमा घरेलु टोली ७ विकेट र ३० रनले विजयी भएको थियो । त्यसअघि भएको टेस्ट सिरिज भने पाहुना टोलीले जितेको थियो ।