एजेन्सी – नेदरल्यान्ड्मा जारी रहेको त्रिकोणात्मक टि ट्वान्टी आई सिरिजको तेस्रो खेलमा घरेलु टोलीले अमेरिकामाथि सानदार जित हात पारेको छ ।

नेदरल्यान्ड्सले आइतवार अमेरिकालाई १ सय २ रनलो फराकिलो अन्तरले हराएको हो । नेदरल्यान्ड्सले दिएको २ सय १८ रनको विशाल लक्ष्य पछ्याएको अमेरिका १५.४ ओभरमा १ सय १५ रन बनाउँदै अल आउट भयो ।

अमेरिकाका लागि शयान जाहाङ्गीरले २९ बलमा सर्वाधिक ३७ रन जोडे । आरोन जोन्सले १८ बलमा ३४ तथा कप्तान मोनांक पटेलले १४ रन जोडे । अमेरिकाका अन्य ब्याटरले दोहोरो अंकमा रन जोड्न सकेनन् ।

नेदरल्यान्ड्सका लागि विक्रमजित सिंहले ३, जैच लायन-कैचेट, पल भान मेकरेन र काइल क्लेनले समान २ तथा आर्यन दत्तले १ विकेट लिए ।

त्यसअघि टस हारेर ब्याटिङको निम्तो पाएको नेदरल्यान्ड्सले २० ओभरमा ५ विकेट गुमाएर २ सय १७ रनको विशाल योगफल तयार गरेको थियो ।

नेदरल्यान्ड्सका लागि कप्तान स्कट एडवाड्स तथा माइकल लेभिटले अर्धशतक बनाएका थिए । कप्तान एडवाड्सले ४० बलमा ४ चौका र ४ छक्काको सहयोगमा नट आउट रहदै सर्वाधिक ८१ रन जोडे । ओपनर लेभिटले ३४ बलमा ६ चौका र ५ छक्काको सहयोगमा ६८ रन जोडे ।

म्याक्स ओ डाउडले १३ बलमा २८, ज़ैच लायन-कैचेटले १४ बलमा १४ तथा काइल क्लेनले १४ बलमा १४ रन जोडे । अमेरिकाका लागि शाल्डी भानले ३ विकेट लिए ।

त्रिकोणात्मक सिरिजमा सोमबार नेदरल्यान्ड्स र क्यानडाबीच खेल हुदैछ ।