एजेन्सी – बंगलादेशले पाकिस्तानमाथि टेस्ट क्रिकेटमा एतिहासिक जित दर्ता गरेको छ । पाकिस्तानको रावलपिन्डी क्रिकेट स्टेडियममा पाहुना टोलीले पहिलो टेस्ट १० विकेटले आइतवार जितेको छ।

बंगलादेशले पाकिस्तान टेस्ट क्रिकेटमा हराएको यो पहिलो पटक हो । यसअघि १३ खेल खेल्दा पाकिस्तान १२ मा विजयी हुँदा १ खेल बराबरीमा सकियो थियो ।

पाकिस्तानले दिएको ३० रनको झिनो लक्ष्य बंगालादेशले कुनै विकेट नगुमाई ६.३ ओभरमा पूरा गर्यो ।बंगलादेशका लागि ओपनरद्वय जाकिर हसन १५ तथा शदमान इस्लाम ९ रनमा नट आउट रहे ।

पहिलो इनिङमा १ सय १७ रनले पछि परेको घरेलु टोलीले दोस्रो इनिङमा १ सय ४६ रन मात्र जोड्न सक्यो । टोलीलका मोहम्मद रिजवानले सर्वाधिक ५१ रन जोडे ।

ओपनर अब्दुल्लाह सफिकले ३७, बाबर अजामले २२ तथा कप्तान शान मक्सुदले १४ रन बनाएका थिए । बंगालादेशका लागि मेहेदी हसन मिराजले ४, शकिब अल हसनले ३ तथा नहिद राना, शरिफुल इस्लाम र हसन महमुदले समान १ विकेट लिए ।

बंगलादेश पहिलो इनिङमा ५ सय ६५ रनमा अल आउट भएको थियो । मुस्फिकुर रहिमले ३ सय ४१ बलमा १ सय ९१ रनको शतकीय पारी खेलेका थिए।

ओपनर शदमान इस्लामले ९३, मेहेदी हसन मिराजले ७७, लिटन दासले ५६, मोमिनुल हकले ५०, साकिब अल हसनले १५, कप्तान नजमल हसन शान्तोले १६ तथा जाकिर हसनले १२ रन बनाए थिए।

घरेलु टोलीका लागि नसिम शाहले ३, साहिन शाह अफ्रिदी, खुरम शाहजाद र मोहम्मद अलिले समान २ विकेट लिए ।

त्यसअघि टस हारेर ब्याटिङको निम्तो पाएको पाकिस्तानले ६ विकेट गुमाएर ४ सय ४८ रन जोड्दै पहिलो इनिङ समाप्तिको घोषणा गरेको थियो । घरेलु टोलीका लागि साउद सकिल र मोहम्मद रिजवानले शतकीय पारी खेलेका थिए ।

बंगलादेशका लागि हसन महमुद र शरिफुल इस्लामले समान २ तथा मेहिदी हसन मिराज र सकिब अल हसनले समान १ विकेट लिए । दुई टोलीबीचको दोस्रो टेस्ट अगस्ट ३० बाट सुरु हुनेछ ।