एजेन्सी – पाकिस्तान क्रिकेट बोर्ड (पिसिबी) ले संयुक्त अरब इमिरेट्स (युएई) मा आयोजना हुने महिला टि ट्वान्टी विश्वकपका लागि १५ सदस्यीय टोलीको घोषणा गरेको छ ।

पिसिबीले कप्तानमा फातिमा सनालाई नियुक्त गरेको छ । उनले अलराउण्डर निदा डारको स्थान लिएकी हुन् ।

२२ वर्षीया फातिमाले टि ट्वान्टी आई तथा आइसिसीको प्रतियोगितामा पहिलो पटक कप्तान गर्दैछिन् । उनले यसअघि ओडिआईमा भने राष्ट्रिय टोलीको नेतृत्व गरिसकेकी छिन् ।

छनोट समितिले गरेको गत महिना श्रीलंकामा भएको महिला टि ट्वान्टी एसिया कपमा टिममा रहेको एक जना परिवर्तन गरिएको छ । सन् २०२३ को महिला टि ट्वान्टी विश्वकपमा पनि सहभागी भएकी ब्याटर सदफ शमासले नाजिहा अल्भीको स्थानमा टोलीमा परेकी छिन् ।

२०२३ को टि ट्वान्टी विश्वकपमा सहभागी १० खेलाडी अहिलेको १५ सदस्यीय टोलीमा अटाएका छन् । बायाँ हाते स्पिनर सादिया इकबालको फिटनेसमा केही समस्या देखिएको छ । अनक्याप्ड बायाँ हाते तिब्र गतिका बलर तस्मिया रुबाबले टोलीमा स्थान बनाएकी छिन् ।

पाकिस्तानले मुख्य टोलीबाट छुटेकी अल्भीलाई पनि ट्राभल रिजर्भमा राखेको छ । महिला टि ट्वान्टी विश्वकप आगामी अक्टोबर ३ देखि युएईमा सुरु हुँदैछ ।

पाकिस्तान समूह ए मा अस्ट्रेलिया, भारत, न्युजिल्यान्ड र श्रीलंकासँगै छ । गत साता बंगलादेशबाट सारिएको प्रतियोगिताको नयाँ खेल तालिका भने सार्वजनिक गरिएको छैन ।

महिला टि ट्वान्टी विश्वकपका लागि पाकिस्तानी टोली

फातिमा सना (कप्तान), आलिया रियाज, डायना बेग, गुल फिरोजा, इराम जावेद, मुनीबा अली (विकेटकिपर), नाशरा सन्धु, निदा डार, ओमैमा सोहेल, सदफ शमस, सादिया इकबाल (फिटनेसमा समस्या), सिद्रा अमीन, सैयदा अरुब शाह, तस्मिया रुबाब, तुबा हसन

ट्राभल रिजर्व – नाजिहा अल्वी (विकेटकिपर)