एजेन्सी – बंगलादेशका क्रिकेटर शकिब अल हसनविरुद्ध हत्या आरोपको मुद्धा दर्ता भएको छ ।

ढाकाको अदबोर प्रहरी चौकीका एक अधिकारीका अनुसार बंगलादेशमा अगस्टको सुरुमा भएको प्रदर्शनका क्रममा भएको हत्याको आरोपमा शकिब सहित १ सय ४७ जनाविरुद्ध मुद्दा दायर गरिएको छ ।

बंगलादेशका सबैभन्दा चर्चित क्रिकेटरका साथै शकिब अवामी लिगबाट निर्वाचित सांसद पनि हुन् । प्रदर्शनको समयमा बंगलादेशकी प्रधानमन्त्री शेख हसिना तथा पार्टीका धेरै पूर्वमन्त्री र सांसदहरू माथि आरोप लगाइएको छ ।

जुन दिन हत्या आरोप लगाइयो त्यो समयमा शकिब बंगलादेशमा थिएनन् । शकिब त्यतिबेला क्यानडामा थिए र ब्राम्पटनमा भइरहेको ग्लोबल टि ट्वान्टी क्यानडा लिगमा बंग्ला टाइगर्सको नेतृत्व गरिरहेका थिए। त्यसअघि शकिब जुलाईको मध्यसम्म मेजर लिग क्रिकेटका लागि अमेरिकामा थिए।

द डेली स्टारले लेखेको छ,’मुद्दाको बयानमा उल्लेख गरिएको केही अभियुक्तहरूले प्रत्यक्ष वा अप्रत्यक्ष रूपमा केही अन्यको निर्देशनअनुसार अगस्ट ५ मा अडाबोर क्षेत्रको रिङरोडमा रुबेलसहित सयौं विद्यार्थीहरूले विरोध प्रदर्शन गरिरहेका बेला गोली चलाएका थिए। गोली लागेर घाइते भएका रुबेलको दुई दिनपछि अस्पतालमा मृत्यु भएको एफआइआरमा उल्लेख छ ।’

संयुक्त राष्ट्रसंघीय मानव अधिकार उच्चायुक्तले जुलाई १६ देखि अगष्ट ४ को बीचमा भएको हिंसाका क्रममा मृत्यु हुनेको संख्या ४ सय भन्दा बढी रहेको बताएको छ। केही रिपोर्टमा यो संख्या ६ सय ५० भन्दा बढी रहेको उल्लेख गरिएको छ । अवामी लिगको पतनपछि बगंलादेशमा अन्तरिम सरकार गठन भएको छ ।

बगंलादेश क्रिकेट बोर्डमा पनि महत्वपूर्ण परिवर्तनहरू भएका छन् । जहाँ पूर्व राष्ट्रिय कप्तान फारुक अहमदले अध्यक्षको रूपमा कार्यभार सम्हालेका छन्।

यसै वर्षको जनवरीमा आफ्नो गृहनगर मागुराबाट आम चुनाव जितेपछि शकिब संसद सदस्य बनेका थिए । उनी अहिले पाकिस्तानविरुद्ध रावलपिण्डीमा टेस्ट खेलिरहेका छन् ।