एजेन्सी – तीन खेलको टेस्ट सिरिजका लागि इङ्ल्यान्ड भ्रमणमा रहेको श्रीलंकाले घरेलु टोलीविरुद्ध दोस्रो इनिङमा सामान्य अग्रता लिएको छ ।

पाहुना टोलीले तेस्रो दिनको खेल सकिदा ६ विकेट गुमाएर २ सय ४ रन जोडेको छ । तेस्रो दिन शुक्रवारको खेल समाप्तीमा श्रीलंकाले ८२ रनको अग्रता लिएको छ । टोलीका कमिन्डु मेन्डिस ५६ तथा दिनेश चण्डिमल २० रनमा नट आउट रहेका छन् ।

दोस्रो इनिङमा श्रीलंकाका ओपनर दिमुथ करुणारत्नेले २७, कप्तान धनन्जय डि सिल्भाले ११ तथा मिलन रत्नायकेले १० रन जोडेका थिए ।

घरेलु टोलीका क्रिस वोक्सले २, जोय रुट, म्याथ्यु पोट, मार्कवुड र गस एटकिन्सनले समान १ विकेट लिए ।
इङ्ल्यान्डले पहिलो इनिङमा ३ सय ५८ रन बनाएको थियो । पहिलो इनिङमा घरलु टोलीले १ सय २२ रनको अग्रता बनाएको थियो ।

पहिलो इनिङमा इङ्ल्यान्डका जेमी स्मिथले टेस्ट करियरको पहिलो शतक बनाउँने क्रममा १ सय ४८ बलमा १ सय ११ रन जोडेका थिए ।

गस एटकिन्सन ४ रनमा नट आउट रहेका थिए । ह्यारी ब्रुकले ५६, जोय रुटले ४२, ड्यान लरेन्स ३०, क्रिस वोक्सले २२, गस एटकिन्सनले २० तथा बेन डुकेट १८ रन जोडेका थिए ।

श्रीलंकाका आसिथा फर्नान्डोले ४, प्रभात जयसुर्याले ३ तथा विश्व फर्नान्डाले २ विकेट लिए ।

त्यसअघि म्यानचेस्टरमा टस जितेर ब्याटिङ गरेको पाहुना टोली २ सय ३६ रनमा अल आउट भएको थियो । श्रीलंकाको पहिलो इनिङमा कप्तान धनन्जय डि सिल्भाले सर्वाधिक ७४ रन जोडेका‌ थिए।

यसै खेलबाट टेस्ट डेब्यु गरेका मिलन रत्नायकेले ७२, कुशल मेन्डिसले २४ रन जोडे । दिनेश चन्डिमलले १७, विश्वा फर्नान्डोले १३, कमिन्डु मेन्डिसले १२ र प्रबात जयसुर्याले १० रन थपे।

घरेलु टोलीका लागि शोयब बसिर र क्रिस वोक्सले समान ३ तथा गस एटकिन्सनले २ विकेट लिएका थिए।