केप टाउन (एजेन्सी) – श्रीलंकाविरुद्ध पाँच एक दिवसिय अन्तर्राष्ट्रिय क्रिकेट श्रृखंलामा ३–० को अग्रता लिइसकेको दक्षिण अफ्रिकाले गए राती चौथो खेलमा ४० रनको जित हासिल गरेको छ । ३ सय ६८ रनको लक्ष्य पछ्याएको श्रीलंकाले ४८.१ ओभरमा सबै विकेट गुमाउँदै ३ सय २७ रन बनाएको थियो ।

राम्रो सुरुवात गरेको श्रीलंकाको पहिलो विकेटका लागि निरोशन डिक्वेला र उपुल थरगांले १ सय ३९ रनको साझेदारी गरेका थिए । डिक्वेलाले अर्धशतक पुरा गरे भने थारंगशाले शतक बनाए । ४७ बलको सामना गर्दै डिक्वेलाले ९ चौकासहित ५८ रन जोडे । थारगांले ९० बलमा ११ चौका र ७ छक्कासहित १ सय १९ रनको योगदान गरे ।

थारगांलाई गुमाउदा श्रीलंकाले ३ विकेटको क्षतिमा २ सय १६ रन बनाइसकेको थियो । तर पछिल्लो क्रममा ब्याट्सम्यान मध्ये सनदुन विराकोडी (५८ रन) र एस्ला गुणारत्ने (३८रन) बाहेक कसैले दोहोरो अंक बनाउन नसक्दा श्रीलंकाले लगातार चौथो हार बेहोर्नु परेको थियो । दक्षिण अफ्रिकाका लागि वायने पार्नेलले ४, ड्वाइने प्रिटोरियस,कागिसो राबाडा र इमरान ताहिरले समान २ विकेट लिए । इमरानले अन्तिम ओभरमा दुई विकेट लिएका थिए ।

त्यसअघि टस जितेर ब्याटिङ रोजेको दक्षिण अफ्रिकाले फा डु प्लेसिसको कीर्तिमानी इनिङ्ससँगै निर्धारित ५० ओभरमा ५ विकेट गुमाएर ३ सय ६७ रनको योगफल तयार गरेको थियो । प्लेसिसले व्यक्तिगत उच्च स्कोर बनाउने क्रममा १ सय ८५ रनको इनिङ्स खेलेका थिए । १ सय ४१ बल खेलेका उनले १६ चौका र ३ छक्का प्रहार गरे ।

टोलीका कप्तान एबी डि भिलियर्सले ६२ बलमा ४ चौकासहित ६४ र क्विन्टन डी ककले ४६ बलमा ७ चौका साथ ५५ रन बनाए । फरहान बेहार्डिनले ३६ र जेपी डुमिनीले २० रन जोडे । भ्रमणकारी टोलीका लागि लाहिरु कुमारा र सचिथ पथिरानाले समान २ तथा लाहिरु माधुशंकाले १ विकेट लिए । श्रृखंलाको पाँचौं तथा अन्तिम खेल शुक्रबार हुनेछ ।