एजेन्सी – तीन खेलको टि ट्वान्टी आई सिरिजका लागि वेस्ट इन्डिज भ्रमणमा रहेको दक्षिण अफ्रिका पहिलो खेलमा घरेलु टोलीसँग पराजित भएको छ ।

ब्रायन लारा क्रिकेट स्टेडियम ट्रिनिडाडमा शनिवार भएको खेलमा घरेलु टोली ७ विकेटले विजयी भएको हो । यो जितसँगै वेस्ट इन्डिजले सिरिजमा १-० को अग्रता लिएको छ ।

दक्षिण अफ्रिकाले दिएको १ सय ७५ रनको मध्यम लक्ष्य वेस्ट इन्डिजले १७.५ ओभरमा ३ विकेट गुमाएर पूरा गर्यो ।

वेस्ट इन्डिजका लागि निकोलस पुरन र शाइ होपले अर्धशतक पूरा गरे । पुरनले २६ बलमा २ चौका र ७ छक्काको सहयोगमा नट आउट रहँदै सर्वाधिक ६५ रन बनाए ।

होपले ३६ बलमा २ चौका र ३ छक्काको सहयोगमा ५१ रन जोडे । ओपनर अलिक अथिनाजले ३० बलमा २ चौका र ३ छक्काको सहयोगमा ४० तथा रोस्टन चेज ४ रनमा नट आउट रहे ।

दक्षिण अफ्रिकाका लागि ओटिन ब्राटम्यानले २ तथा केविन मफाकाले १ विकेट लिए ।

टस हारेर पहिले ब्याटिङको निम्तो पाएको पाहुना टोलीले निर्धारित २० ओभरमा ७ विकेट गुमाएर १ सय ७४ रन को मध्यम योगफल बनाएको थियो ।

दक्षिण अफ्रिकाका ट्रिस्टन स्टम्सले ४२ बलमा ८ चौका र ३ छक्काको सहयोगमा सर्वाधिक ७६ रन जोडे । प्याट्रिक कुर्जरले ३२ बलमा ४४ तथा कप्तान एडेन मारकमले १४ बनाए ।

घरेलु टोलीका लागि म्याथ्यु फोर्डले ३, शेमार जोसेफले २ तथा अकिल होसेन र रोमारियो शेफर्डले समान १ विकेट लिए । दुई टोलीबीचको दोस्रो खेल सोमवार र तेस्रो खेल बुधवार हुनेछ ।