एजेन्सी – दुई खेलको टेस्ट सिरिजका लागि पाकिस्तान भ्रमणमा रहेको बंगलादेशविरुद्ध घरेलु टोलीले तेस्रो दिन पनि अग्रता कायमै राखेको छ ।

पाकिस्तानको रावलपिन्डी क्रिकेट स्टेडियममा तेस्रो दिन शुक्रवारको खेल सकिदा पाहुना टोलीविरुद्ध घरेलु टोलीको अग्रता कायमै रहेको हो ।

तेस्रो दिनको समाप्तीमा बंगालादेशले ५ विकेट गुमाएर ३ सय १६ रन जोडेको छ । टोलीका लिटन दास ५२ र मुस्फिकुर रहिम ५५ रनमा नट आउट छन् । तेस्रो दिनको खेल सकिँदा बंगलादेश १ सय ३२ रनले पछि छ ।

ओपनर शदमान इस्लामले ९३, मोमिनुल हकले ५०, साकिब अल हसनले १५, कप्तान नजमल हसन शान्तोले १६ तथा जाकिर हुसैन १२ रनमा जोडे । घरेलु टोलीका लागि खुरम शाहजादले २, नसिम शाह, सइम अयुब र मोहम्मद अलिले समान १ विकेट लिए ।

त्यसअघि टस हारेर ब्याटिङको निम्तो पाएको पाकिस्तानले ६ विकेट गुमाएर ४ सय ४८ रन जोड्दै पहिलो इनिङ समाप्तिको घोषणा गरेको थियो । घरेलु टोलीका लागि साउद सकिल र मोहम्मद रिजवानले शतकीय पारी खेलेका थिए ।

रिजवानले सर्वाधिक १ सय ७१ त सकिलले १ सय ४१ रन बनाएका थिए । ओपनर सइम अयुबले ९८ बलमा ५६, शाहिन शाह अफ्रिदीले २४ बलमा नट आउट २९ रन जोड्दा आगा सलमानले १९ रन थपेका थिए ।

बंगलादेशका लागि हसन महमुद र शरिफुल इस्लामले समान २ तथा मेहिदी हसन मिराज र सकिब अल हसनले समान १ विकेट लिए । दुई टोलीबीचको दोस्रो टेस्ट अगस्ट ३० बाट सुरु हुनेछ ।