केप टाउन (एजेन्सी) – श्रीलंकाविरुद्ध पाँच एक दिवसिय अन्तर्राष्ट्रिय क्रिकेट श्रृखंलामा ३–० को अग्रता लिइसकेको दक्षिण अफ्रिकाले चौथो खेलमा पनि ३ सय ६८ रनको लक्ष्य दिएको छ । चौथो खेलमा मंगलबार टस जितेर ब्याटिङ रोजेको दक्षिण अफ्रिकाले फा डु प्लेसिसको कीर्तिमानी इनिङ्ससँगै निर्धारित ५० ओभरमा ५ विकेट गुमाएर ३ सय ६७ रनको योगफल तयार गरेको छ ।  

३ रनमै पहिलो विकेट गुमाएको दक्षिण अफ्रिकाका लागि तेस्रो नम्बरमा ब्याटिङ गरेको डु प्लेसिसले शतकिय इनिङ्स मात्र खेलेनन् व्यक्तिगत उच्च स्कोर समेत बनाए । उनले १ सय ८५ रन बनाएका थिए । १ सय ४१ बल खेलेका उनले १६ चौका र ३ छक्का प्रहार गरे ।

अन्तिम ओभरको दोस्रो बलमा ठुलो सर्ट प्रहार गर्ने क्रममा क्याच आउट भएका डु प्लेसिसले ग्यारी क्रिस्टनको १ सय ८८ रनको दक्षिण अफ्रिकी ब्याट्सम्यानको व्यक्तिगत उच्च स्कोर कीर्तिमानलाई भने तोड्न सकेनन् । टोलकिा कप्तान एबी डि भिलियर्सले ६२ बलमा ४ चौकासहित ६४ र क्विन्टन डी ककले ४६ बलमा ७ चौका साथ ५५ रन बनाए । फरहान बेहार्डिनले ३६ र जेपी डुमिनीले २० रन जोडे ।

भ्रमणकारी टोलीका लागि लाहिरु कुमारा र सचिथ पथिरानाले समान २ तथा लाहिरु माधुशंकाले १ विकेट लिए ।