एजेन्सी – टि२० अन्तर्राष्ट्रिय क्रिकेटको एकै ओभरमा ३९ रन बनाएर सामोआका ब्याट्सम्यान डारियस भिसेरले नयाँ कीर्तिमान कायम गरेका छन् ।

भिसेरले भानुनुआतुविरुद्धको टि ट्वान्टी विश्वकप पूर्वी एसिया–प्रशान्त क्षेत्र छनोटमा एकै ओभरमा ३९ रन बनाएका हुन् । आफ्नो तेस्रो टि ट्वान्टी आईमा २८ वर्षीय भिसेरले नलिन निपिकोको ओभरमा ६ छक्का र ३ नोबल सहित ३९ रन बनाएका हुन् ।

पुरुष टि ट्वान्टी आईमा एक ब्याट्सम्यानले एक ओभरमा ६ छक्का प्रहार गरेको यो चौथो पटक हो । पहिलो पटक कुनै टिमले एक ओभरमा ३६ भन्दा बढी रन बनाएको हो ।

समोआको पारीको १५ औं ओभरमा यो रेकर्ड बनेको थियो । भिसेरले निपिकोको पहिलो तीन बलमा डीप मिडविकेटमा छक्का प्रहार गरेका थिए । ओभरको चौथो बल नो बल थियो । फ्रि-हिटमा भिसेरले लेग साइडमा छक्काको लागि प्रहार गरेका थिए । त्यसपछि एक डट बल भएको थियो ।

निपिकोले पाँचौ बलमा दोस्रो पटक नो-बल गरे । फ्रिहिटमा पुनः छक्का प्रहार भयो । त्यसपछि पुन: नो बलमा छक्का प्रहार गरेपछि अर्को फ्री हिटमा पनि भिसेरले डीप स्क्वायर लेगमा फ्लिक गर्दै छक्का प्रहार गरे । सबै गरेर ओभरमा ३९ रन बन्यो ।

यसअघि पुरुष टी ट्वान्टी आईमा एक ओभरमा ३६ रन बनाएको काम पाँच पटक भएका थिए । सन् २००७ को टि ट्वान्टी विश्वकपमा इंग्ल्यान्डका स्टुअर्ट ब्रोडको बलमा भारतका युवराज सिंहले ६ छक्का प्रहार गरेका थिए । वेस्ट इन्डिजका किरोन पोलार्डले सन् २०२१ मा श्रीलंकाकी अकिला धनञ्जयविरुद्ध र नेपालका दीपेन्द्रसिंह ऐरीले यो उपलब्धि दोहोर्याएका थिए ।

सन् २०२४ मा वेस्ट इन्डिजका निकोलस पुरन तथा भारतका राेहत शर्मा र रिंकु सिंहले अफगानिस्तानविरुद्ध एकै ओभरमा समान ३६ रन बनाएका थिए । उनीहरुले एकै ओभरमा ६ छक्का भने प्रहार गरेका थिएनन् ।