काठमाडौं (हाम्रो खेलकुद)- नेपाल प्रिमियर लिग(एनपिएल) को सुरुवातमा नै धेरै अपेक्षा राख्न नहुने नेपाल क्रिकेट टोलीका पुर्वकप्तान समेत रहेका लेगस्पिनर सन्दीप लामिछानेले बताएका छन् ।

एपिएलको लोगो तथा मिती सार्वजनिक गर्न आयोजित कार्यक्रम पछि हाम्रो खेलकुदसँग कुरा गर्दै सन्दीपले लिगबाट अहिले नै ठूलो अपेक्षा नगर्न अनुरोध गरेका छन् ।

‘एकैचोटी धेरै अपेक्षा राख्नु म जायज ठान्दिन । आज एउटा सुरु भएको छ । यसबाट यही वर्ष भन्दा पनि अबको ५ वर्ष पछिको बारेमा सोचौ,’ सन्दीपले भने, ‘यो लिग कहाँ हुनेछ । कस्तो रुपमा हुनेछ । कसरी यसले इन्टरनेसनल फ्रेन्चाइज लिगको रुपमा आफुलाई स्थापित गर्नेवाला छ । कसरी वर्ल्डकै प्रमुख लिगमा आउँनेछ । यसको यात्रा रमाइलो हुनेछ ।’

उनले आफ्नो लागि वर्ल्डकप एउटा ड्रिम रहेको र त्यो पूरा गर्न पाएकोमा खुसी लागेको उनले बताए । ‘वर्ल्डकप भनेको सबैका लागि एउटा ड्रिम हो । ८/९ वर्ष भइसकेको थियो नेसनल टिमबाट खेलेको पनि वर्ल्डकपको ड्रिम थियो । पूरा भएको छ,’ उनले भने ‘हामीले धेरै खेलहरु नजिक नजिक पुगेर हार्न पुग्यौ । त्यसलाई जितमा बदल्न सकिन्थ्यो । केही छैन अर्को पटक राम्रो गर्नेछौ । विश्वकपले हरेक खेलाडीमा विश्वका जुनसुकै टिमलाई समेत हामीले हराउन सक्छौ भन्ने विश्वास चै आएको छ ।’

आफुले एनपिएलका लागि गर्न सक्ने हरेक किसिमको सहयोग गर्न आफु तयार रहेको सन्दीपले बताए । ‘मसँग नजिक हुनु भएका विदेशी प्लेयरलाई कन्ट्याक गर्ने हुन्छ । या लिगलाई भव्य बनाउन मेरो तर्फबाट हुने सबै योगदान दिन म तयार रहेको छु,’ सन्दीपले थपे , ‘लिगको मिति घोषणा भएको समयमा हामीसँग कुनै पनि लिग नजुध्ने र त्यो समयमा इन्टरनेसनल गेमहरु पनि कम हुने हुँदा सहज हुनेछ ।’

नेपाल क्रिकेट संघ (क्यान) को आयोजनामा एपिएलको पहिलो संस्करण मंसिर १५ देखि पुस ६ गतेसम्म हुनेछ ।
समर्थकहरुका कारण नेपाली क्रिकेट विश्वकप लगायतका मन्चमा छुट्टै छाप छोड्न सफल भएको सन्दीपले बताए ।

उनले अगाडि भने ‘पहिले मैले हरेक लिगमा गएर नेपाली समर्थकका बारेमा भनिरहनु पर्ने थियो । गएको वर्ल्डकप पछि सबै जनाले नेपाली क्रिकेट समर्थकका बारेमा थाहा पाइसक्नु भएको छ ।’

क्यानडाबाट आइतवार स्वदेश फर्केका सन्दीप आज भारत जाने बताइएको छ। विश्व कप लिग टुको‌ तयारीका क्रममा नेपाली राष्ट्रिय क्रिकेट टोली भारतमा रहेको छ।