काठमाडौं (हाम्रो खेलकुद)– एक्सपर्ट स्कुल क्रिकेटको उद्घाटन खेल मेरिडियन इन्टरनेसल स्कुलले हेर्बोन स्कुललाई ६४ रनले हराएको छ । एपिएफको मैदानमा भएको खेलमा टस हारेर पनि ब्याटिङको निम्ता पाएको मेरिडियनले निर्धारित २५ ओभरमा ७ विकेट गुमाएर १ सय ३० रन बनाएको थियो । जवाफमा हेर्बोनले १६.२ ओभरमा सबै विकेट गुमाएर ६६ रन मात्र बनाउन सक्यो ।

हेर्बोनलाई लक्ष्यमा पुग्नबाट रोक्न मेरिडियनका इरफान खानले उच्च प्रदर्शन गरे । ४.२ ओभर बलिङ गरेका इरफानले १ मेडन राख्दै ९ रन दिएर ४ विकेट लिएका थिए । दीनेश लेप्चाले २, निवेश सिलवाल, प्रत्युश अवस्थी र सुरेन्द्र बस्नेतले समान १ विकेट लिए । हेर्बोनका कृष्ण यादवले २९ बलमा ४ चौकासहित २१ रन बनाए । सुनिल श्रेष्ठले १२ र निश्चल केसीले १० रन जोडे ।

त्यसअघि सुरेन्द्र बस्नेतको ४० रनको मद्दतमा मेरिडियनले सय रन नघाएको थियो । सुरेन्द्रले ६२ बलमा ६ चौका प्रहार गरे । बलिङमा उच्च प्रदर्शन गर्नुअघि इरफानले ५४ बलमा ३ चौकासहित २८ रन बनाएका थिए । हेर्बोनका सुजन पौडेलले ३ र सुनिलले १ विकेट लिएका छन् । इरफान म्यान अफ दी म्याच घोषित भए ।

त्यसअघि सशस्त्र प्रहरी बलका एआइजी शैलेन्द्र खनालले प्रतियोगिताको उद्घाटन गरेका थिए । उद्घाटनमा एक्सपर्ट इजुकेसन एन्ड भिसा सर्भिसका जेनेरल मेनेजर जयराम अर्याल, राष्ट्रिय क्रिकेट टोलीका प्रशिक्षक जगत टमाटा, राष्ट्रिय क्रिकेट खेलाडी प्रदीप ऐरी, प्रतियोगिता संयोजक सुवास प्रधान, सुमन भट्ट र कवि महर्जनको पनि उपस्थिति थियो ।