एजेन्सी – श्रीलंकाले भारतविरुद्ध २७ वर्ष पछि ओडिआई सिरिज जितेको छ । घरेलु टोली श्रीलंकाले भारतविरुद्धको ३ खेलको ओडिआई सिरिज २-० ले जितेको हो ।

सिरिजको तेस्रो तथा अन्तिम खेल श्रीलंकाले १ सय १० रनले जितेको हो । सिरिजको पहिलो खेल बराबरीमा सकिदा दोस्रो खेल श्रीलंकाले ३२ रनले जितेको थियो ।

श्रीलंकाले दिएको २ सय ४९ रनको लक्ष्य पछ्याएको भारतले २६.१ ओभरमा अल आउट हुदै १ सय ३८ रन मात्र बनायो ।

भारतका लागि कप्तान तथा ओपनर रोहित शर्माले २० बलमा सर्वाधिक ४५, वासिङ्टन सुन्दरले ३०, विराट कोहलीले २० तथा रियान परागले १५ रन जोडे । भारतका अन्य खेलाडीले दोहोरो अंकमा रन बनाउँन सकेनन् ।

श्रीलंकाका लागि दुनिथ विलालागेले ५.१ ओभरमा २७ रन खर्चिएर ५ विकेट लिए । जेर्फि भेन्डारसे र महेश तिक्सेनाले समान २ तथा आसिथा फर्नाडाले १ विकेट लिए ।

त्यसअघि टस जितेर पहिले ब्याटिङ गरेको श्रीलंकाले निर्धारित ५० ओभरमा ७ विकेट गुमाएर २ सय ४८ रन बनाएको थियो ।

श्रीलंकाका लागि अविष्का फर्नान्डो र कुशल मेन्डिसले अर्धशतकीय ईनिङ खेले । फर्नान्डोले १ सय २ बलमा सर्वाधिक ९६ रन बनाए । उनले ९ चौका र २ छक्का प्रहार गरे ।

मेन्डिसले ८२ बलमा ५९ रन बनाए । ओपनर पथुम निशंकाले ६५ बलमा ४५, कमान्डु मेन्डिसले १९ बलमा अविजित २३ रन जोडे ।

भारतका लागि यसै खेलमा ओडिआई डेब्यु गरेका रियान परागले ३, वासिङ्टन सुन्दर, मोहम्मद सिराज, कुलदिप यादव र अक्षर पटेलले समान १ विकेट लिए ।

सन् १९९७ मा श्रीलंकाले पछिल्लो पटक भारतविरुद्धको ओडिआई सिरिज जितेको थियो । भारतविरुद्ध लगातार ११ ओडिआई सिरिज गुमाएको श्रीलंकाले २७ वर्ष पछि यो सफलता प्राप्त गरेको हो ।