एजेन्सी – क्यानडा टि ट्वान्टी लिगमा नेपाली कप्तान रोहित कुमार पौडेल आबद्ध टोरोन्टो नेसनल्स लगातार दोस्रो खेलमा पराजित भएको छ ।

क्यानडामा मंगलबार भएको खेलमा बंग्ला टाइगर्ससँग टोरोन्टो नेसनल्स २ रनले पराजित भएको हो । टाईगर्सले दिएको १ सय ६९ रनको लक्ष्य पछ्याएको नेसनल्सले निर्धारित २० ओभरमा ७ विकेट गुमाएर १ सय ६६ रन मात्र बनाउन सक्यो ।

टोरोन्टोका लागि निकोलस किर्तनले ५४ बलमा सर्वाधिक ७४ रन बनाए । रोमारियो शेफर्डले अविजित २४, कप्तान कोलिन मुनरो र रोस्टन चेसले समान १७ रन जोडे ।

बंग्लाका लागि अलि खानले २ तथा डिबिड विजे, सरिफुल स्लाम, साकिब अल हसन र इफ्तिखार अहमदले समान १ विकेट लिए । रोहित भने यो खेलमा बेन्चमा थिए ।

त्यसअघि टस हारेर पहिले ब्याटिङ गरेको बंग्लाले निर्धारित २० ओभरमा ७ विकेट गुमाएर १ सय ६८ रन बनायो । बंग्लाका लागि लागि डेबिड विजेले १७ बलमा अविजित रुपमा सर्वाधिक ३८ रन बनाए ।

ओपनर मोहम्मद वासिमले १८ बलमा २७, कप्तान साकिब अल हसन र ओपनर रहमानउल्लाह गुर्बाजले समान २४ रन बनाए ।

टोरोन्टोका लागि रोमारियो शेफर्ड र साद विन जाफरले समान २ तथा मोहम्मद नवाज, मोहम्मद रोहिद र जुनैद सिद्धिकीले समान १ विकेट लिए ।

लगातार दोस्रो हार ब्यहोरेको टोरोन्टो ४ अंकका साथ दोस्रो स्थानमा कायमै छ ।