काठमाडौं (हाम्रो खेलकुद) – नेपाल राष्ट्रिय क्रिकेट टोलीका कप्तान रोहित पौडेल र अल-राउन्डर दीपेन्द्र सिंह ऐरी क्यानडियन फ्रेन्चाइज लिग ग्लोबल टि-२० का लागि आज राती प्रस्थान गर्ने भएका छन् । दुवै दिल्लीबाट क्यानडाका लागि प्रस्थान गर्दैछन् ।

भिसा आउन समय लागेका कारण दीपेन्द्र शुक्रवार देखि सुरु हुने लिगका लागि ढिलो प्रस्थान गर्दैछन् । उनी यसपटक भ्यानकुभर क्नाइट्सबाट खेल्दैछन् । सोही टोलीमा लेग स्पिनर सन्दिप लामिछाने समेत रहेका छन् । सन्दिप भने क्यानडा पुगिसकेका छन् ।

यस्तै नेपाली राष्ट्रिय टोलीका कप्तान रोहित कुमार पौडेल पनि बिहीबार नै क्यानडा प्रस्थान गर्नेछन् । भिसामा ढिलाइका कारण नै उनी पनि ढिलो जाने भएका हुन् ।

लिगको उद्दघाटन खेलमा शुक्रवार बिहान टोरोन्टो र भ्यानकुभर भिड्ने तालिका रहेका छ । दीपेन्द्र र रोहितले पहिलो खेलमा उपस्थित हुने छैनन् ।

रोहित पहिलो पटक विदेशी फ्रेन्चाइज लिग खेल्दैछन् । उनलाई टोरोन्टो नेशनल्सले अनुबन्ध गरेको छ । न्यूजिल्यान्डका कोलिन मन्रो, वेस्ट इन्डिजका रोमारियो शेफर्ड र दक्षिण अफ्रिकाका र्यासी भ्यान डर डसन समेत टोरोन्टोमा रहेका छन् ।

दीपेन्द्रले यसअघि २०२३ को संस्करण मोन्ट्रियल टाइगर्स बाट खेल्दै उपाधि समेत जितेका थिए । उता विभिन्न फ्रेन्चाइज लिग हरुको अनुभव बोकिरहेका सन्दिपले पनि मोन्ट्रियल र टोरोन्टोमा अनुबन्ध भएर यस लिग खेलिसकेका छन् ।

यस संस्करणको ग्लोबल टि-२० लिग जुलाई २६ देखि सुरु हुँदै छ ।