काठमाडौं (हाम्रो खेलकुद) – एसिसि महिला एशिया कप २०२४ अन्तर्गत समूह चरणको आफ्नो दोस्रो खेलमा नेपालले पाकिस्तान विरुद्ध प्रतिस्पर्धात्मक योगफल खडा गरेको छ । टस हारेर पहिला ब्याटिङ गरेको नेपालले निर्धारित २० ओभरमा ६ विकेटको क्षतिमा १०८ रन जोड्न सफल रह्यो ।

नेपालका लागि कविता जोशीले २३ बलमा ४ चौका र १ छक्का सहित सर्वाधिक ३१ रन बनाएर अविजित रहिन् । पूजा महतोले ३२ बलमा ३ चौका नै प्रहार गर्दै २५ रन बनाइन् । छैठौं विकेटका लागि ३४ रनको साझेदारी गर्दै कविता र पूजाले नेपाललाई राम्रो स्कोरतर्फ डोर्याएका थिए । यस्तै ओपनर सिता राना मगरले ३० बलमा ३ चौका सहित २६ रन जोडिन् ।

नेपालका तीन ब्याटर रन आउट हुन पुग्ने । अनुभवी खेलाडीद्वय सिता राना मगर र रुबिना क्षेत्री रनआउटकै शिकार बने । केही तालमेल मिलेन भने कतै खेलाडीहरु आफै सुस्त देखिए ।

युएई विरुद्धको पछिल्लो खेलमा सानदार प्रदर्शन गरेकी ओपनर सम्झना खड्का आज भने पहिलो ओभरमै आउट भइन् । १ चौका प्रहार गरेकी उनी फतिमा सनाको बलमा म्याच आउट भएकी थिइन् । तीन नम्बरमा क्रिजमा पुगेकी कविता कुँवरले भने राम्रो सुरुवात दिलाएकी थिइन् । तर १३ बलमा ३ चौका सहित १३ रन नै बनाएको अवस्थामा उनलाई सदिया इकबालले पेभेलियण फर्काइन् ।

कप्तान इन्दु वर्माले आज पनि लामो समय क्रिजमा समय बिताउन सकिनन् । उनी दुई बल खेल्दै शून्यमै सदियाकै बलमा बोल्ड भइन् ।

पाँचौं नम्बरमा ब्याटिङ गर्न पुगेकी रुबिना क्षेत्रीले भने सुस्त सुरुवात गरिन् । तीन विकेटको क्षतिमा रहेको नेपाललाई सम्हाल्ने क्रममा उनले १४ बलमा १ चौका प्रहार गर्दै ८ रन बनाइन् । उनी १०औं ओभरमा रनआउट भइन् ।

सुरुवात देखि इनिङ सम्हालेकी सिता राना मगर पनि रनआउट नै हुन पुगिन् । उनी १४औं ओभरमा दुई रन लिने क्रममा रन आउट भइन् । अन्तिम ओभरमा पूजा महतो पनि रनआउट भइन् । बाइमा रन लिने क्रममा कविता जोशीले उनलाई फर्काइदिएपछि उनी रन आउट भएकी थिइन् । कविता र विन्दु रावल नट आउट रहे ।

पाकिस्तानका लागि सादिया इकवालले २ विकेट लिँदा फतिमा सनाले १ विकेट लिन सफल रहिन् ।

पहिलो खेलमा जित हासिल गरेको नेपालको आजको खेलमा जित दर्ता गरेमा सेमिफाइनलमा स्थान पक्का हुनेछ । भारतले २ खेल जितिसकेको छ । युएईले २ खेलमा हार बेहोरेको छ भने पाकिस्तान पहिलो खेलमा भारत विरुद्ध पराजित भएको थियो ।