नेपाल पाकिस्तान विरुद्ध पहिला ब्याटिङ गर्दै

काठमाडौं (हाम्रो खेलकुद) – एसिसि महिला एशिया कप २०२४ को आफ्नो दोस्रो खेलमा नेपालले टस हारेर पहिला ब्याटिङ गर्ने भएको छ । पाकिस्तानकी कप्तान निदा दरले टस जितेर पहिले बलिङ गर्ने निर्णय गरेपछि नेपालले पहिला ब्याटिङ गर्ने भएको हो ।

नेपालले युएई विरुद्ध जित हासिल गरेको टोलीमा एक परिवर्तन गरेको छ । सबनम राईको स्थानमा रोमा थापा टोलीमा आएकी छन् ।

नेपालको प्लेइङ ११:

इन्दु वर्मा (कप्तान), रुविना क्षेत्री, सिता राना मगर, कविता कुँवर, सम्झना खड्का, कविता जोशी, काजोल श्रेष्ठ (विकेटकिपर) , पूजा महतो, विन्दु रावल, कृतिका मरासिनी, रोमा थापा

प्रतियोगिताको उद्दघाटन खेल युएई विरुद्ध ऐतिहासिक जित पछि नेपाल उच्च मनोबलमा हुनेछ । तर पाकिस्तान नेपालका लागि कठिन प्रतिद्वन्द्वी रहनेछ ।

त्यो नेपालको एसिया कप इतिहासमा पहिलो जित थियो । यसअघि सन् २०१२ र २०१६ मा गरी खेलेको दुई संस्करणमा नेपालले सबै ९ खेलमा हार बेहोरेको थियो ।

उता पाकिस्तान भने पहिलो खेलमा भारतसँग सहजै पराजित भएको थियो । भारतले पाकिस्तानलाई ७ विकेटले हराएको थियो ।

नेपालले आजको खेलमा जित एक अविश्वसनिय नतिजा नै हुनेछ । आज सफलता मिलेको अवस्थामा नेपालको अर्को चरणमा पुग्ने सम्भावना समेत बलियो बन्नेछ ।