काठमाडौं (हाम्रो खेलकुद) – नेपाले भारतमा जारी दोस्रो दृष्टिबिहिन टि ट्वान्टी विश्व कप क्रिकेट प्रतियोगितामा अर्को हार बेहोरेको छ । नेपाल शनिबार भारतको मुम्बईमा वेस्ट इन्डिजसँग ४३ रनले पराजित भएको छ । प्रतियोगितामा नेपालको यो चौथो हार हो ।

नेपाल अष्टे«लियासँग १० विकेट, बंगलादेशसँग ५९ रन र पाकिस्तानसँग १० विकेटले पराजित भएको थियो । नेपालले दक्षिण अफ्रिकालाई ६ विकेटले हराएको थियो । नेपालले यसअघिका तीनै खेल दिल्लीमा खेलेको थियो ।
मुम्बईको बान्द्रा स्थित एमआईजी मैदानमा टस जितेको नेपाले पहिले फिल्डिङको निर्णय लिएको थियो । वेस्ट इन्डिजले पहिले ब्याटिङ गर्दै निर्धारित २० ओभर ७ विकेट गुमाएर २ सय ८ रन बनाएको थियो । २ सय ९ रन विजय लक्ष्य पछ्याउन नेपाली टोलीले ३ विकेट गुमाएर १ सय ६५ रन बनाएको थियो । नेपालका लागि सुनिल थापा मगरले अर्धशतक पुरा गरे ।

‘बी थ्रि क्याटेगोरी’ का सुनिलले ५१ बलमा १० चौकासहित अविजित ७० रनको योगदान गरे । जुन अन्तर्राष्ट्रिय प्रतियोगितामा नेपाली खेलाडीले बनाएको तेस्रो सर्बाधिक ब्यक्तिगत स्कोर हो भने नेपालको पाँचौ अर्धसतक हो । अन्तर्राष्ट्रिय प्रतियोगितामा सुनिलको यो पहिलो अर्धसतक हो । लोकबहादुर थापाले पनि २९ बलमा ३ चौकासहित अविजित ३६ रन जाडे । ओपनर ब्याट्सम्यान सुनिल राना मगरले २६ बलमा २५ रन, पदमबहादुर बडैला ११ रन र सुनिल सुबेदी क्षेत्री ३ रन बनाए ।

वेस्ट इन्डिजका लागि भने सुरुवाती ब्याट्सम्यान केभिन एन्ड्रयु डगलासले ५९ बलमा १० चौका साथ ९६ रनको प्रहार गरे । लेरोय फिलिप्सले १३ बलमा २३ रन तथा कनिल ग्राहमले २२ बलमा २७ रन प्रहार गरे ।

नेपाली टोलीका प्रशिक्षक रीजन प्रजुले कमजोर फिल्डिङका कारण जित्नु पर्ने खेल गुमाउनु परेको बताए । ‘वेस्टइन्डिजविरुद्ध खेलाडीले फिल्डिङमा निक्कै खराव प्रदर्शन गरे । फिल्डिङमा हामीले ३० रन जति बढि दियौं । त्यसैले जित्नु पर्ने खेलमा पराजित हुनपुग्यौं’, प्रशिक्षक प्रजुले भने, ‘यद्यपि यो खेलमा बलिङ र ब्याटिङ उत्कृष्ट देखिएको छ ।’

नेपालका लागि सुनिल थापा मगर, रमेश बहादुर बानिँया, बिक्रम बहादुर राना र पदम बहादुर बडैलाले समान १ विकेट लिए । प्रतियोगिताअन्तर्गत नेपालले आइतबार पुनेमा श्रीलंकासँग खेल्नेछ ।