काठमाडौं (हाम्रो खेलकुद) – भक्तपुर जिल्ला क्रिकेट संघले एनसीसी आमन्त्रित उपत्यकाव्यापी टि ट्वान्टी क्रिकेट प्रतियोगिता आयोजना गर्ने भएको छ । महिला र पुरुषको छुट्टाछुट्टै प्रतिस्पर्धा हुनेछ ।

शैक्षिक संस्था एनसीसीएस समूहसँग मिलेर भक्तपुरले जेठ १२ देखि १९ गते सम्म आयोजना गर्ने प्रतियोगितामा पुरुषतर्फ ६ एकेडेमी र महिलातर्फ ३ जिल्लाले सहभागिता रहने आइतबार पत्रकार सम्मेलनमार्फत जानकारी दिइयो ।

पुरुषतर्फ भक्तपुर, काठमाडौं र ललितपुरका २–२ एकेडेमीले प्रतिस्पर्धा गर्ने भक्तपुर क्रिकेट संघका अध्यक्ष मनीषराज पाण्डेले जानकारी दिए । नेपाल क्रिकेट संघ (क्यान) र बागती प्रदेश क्रिकेट संघको सहकार्यमा हुने प्रतियोगिताले देशको क्रिकेट विकासमा सहयोग पु¥याउने अपेक्षा लिएको पूर्वराष्ट्रिय खेलाडीसमेत रहेका पाण्डेले बताए ।

सहभागी टोलीहरू भक्तपुर क्रिकेट सेन्टर, भक्तपुर क्रिकेट एक्सिलेन्स सेन्टर, बल पार्क स्पोटर््स इभेन्ट्स एन्ड एकेडेमी ललितपुर, ग्रेट हिमालय क्रिकेट एकेडेमी ललितपुर, क्रिकेट एक्सिलेन्स सेन्टर काठमाडौं र ओएसिस क्रिकेट एकेडेमी काठमाडौं छन् । सहभागी टोलीलाई दुई समूहमा विभाजन गरिएको छ ।

समूहका शीर्ष दुई टोली सेमिफाइनल पुग्नेछन् । मूलपानी क्रिकेट मैदानमा हुने प्रतियोगिताको महिलातर्फ भक्तपुर, काठमाडौं र ललितपुर जिल्ला डबल राउन्ड रोबिनमा प्रतिस्पर्धा गर्नेछन् र शीर्ष दुई टोली फाइनलमा खेल्नेछन् । महिला र पुरुष दुवैको विजेताले समान २५ हजार र दोस्रो टोलीले १५ हजार रुपैयाँ पाउनेछ ।

सबै सरोकारवालाहरूलाई लिएर अगाडि बढ्न खोजिरहेका छौं,’ जिल्ला क्रिकेट संघका अध्यक्ष पाण्डेले भने, ‘क्रिकेटमय वातावरण बनाउने लक्ष्य राखेका छौं । त्यो वातावरण यस्तैखाले प्रतियोगिताले दिने विश्वास छ ।’ एनसीसीएस समूहका निर्देशक सन्तोषराज मास्केले क्रिकेटमा कम्पनीले सानो सहयोग गरेको जनाए ।