काठमाडौं (हाम्रो खेलकुद)– नेपालले दोस्रो दृष्टिबिहिन टि ट्वान्टी विश्व कपमा अर्काे खराब प्रदर्शन गर्ने क्रममा शुक्रबार दाबेदार मध्येको पाकिस्तानसँग १० विकेटको फराकिलो हार बेहारेको छ । चौथो खेलमा नेपालको यो तेस्रो हार हो ।

यस अघि अष्टे«लियासँग खेल पनि नेपालले १० विकेटले गुमाएको थियो । दोस्रो खेलमा बंगलादेशसँग ५९ रनले पराजित भएको नेपालले दक्षिण अफ्रिकालाई बिहीबार ६ विकेटले हराएको थियो ।
हारका वावजुद नेपालले पाकिस्तानविरुद्ध अहिले सम्मकै उच्च योगफल बनाएको छ । दिल्ली बिकास प्राधिकरण (डिडिए) को मैदानमा टस हारी पहिले ब्याटिङ गरेको नेपालले निर्धारित २० ओभरमा आठ विकेट गुमाउदै एक सय १८ रन बनाएको थियो । यसअघि पाकिस्तानसँग दुई भेटमा नेपालको स्कोर यो भन्दा कम थियो ।

नेपालले यस अघि सन् २०१२ मा भएको पहिलो टि ट्वान्टी विश्वकपमा नेपालले पाकिस्तानविरुद्ध ९३ रन बनाएको थियो । गत बर्ष भएको एसिया कपमा ८४ रन मात्र जोड्न सकेको थियो ।
पाकिस्तानले ७.५ ओभरमा बिना कुनै क्षति लक्ष्य भेट्टायो । पाकिस्तानका लागि सुरुवाती ब्याट्सम्यान रीयासत खानले २० बलमा ५६ रन बनाए । माती उल्लाहले ३५ बलमा ५० रन जोडेका थिए । नेपालका लागिसुनिल थापा मगरले ४० बलमा ७ चौकासहित ४० रन बनाए । त्यस बाहेक सुरुवाती ब्याट्सम्यान रमेश बहादुर बानियाँले १५ रन तथा लोक बहादुर थापा र पदम बहादुर बडैलाले समान १० रन जोड्दा अन्य नेपाली ब्याट्सम्यानले गतिलो प्रदर्शन गर्न सकेनन् । कप्तान किर्तन श्रेष्ठ दुवालले सात रन जोड्दा सुनिल सुबेदी क्षेत्री र बद्रि चौलागाईले दुईदुई रन जोडे । बलिङतर्फ पाकिस्तानका सना उल्ला खान एक्लैले दुई विकेट लिएका थिए ।

‘पाकिस्तान प्रतियोगिताकै उपाधि दाबेदार टोली हो । त्यस्तो टोलीविरुद्ध हामीले आफ्नो टोलीको प्रदर्शन सुधार गरेका छौं । पहिलेको भन्दा अहिले बढि योगफल जोड्न सफल भएका छौं’, नेपाली टोलीका ब्यवस्थापक निरोज गिरीले भने, ‘त्यसैले पराजयका बाबजुद टोलीको प्रदर्शनलाई लिएर खुसी छौं । यो प्रदर्शनले आगामी खेलमा पनि उत्कृष्ट प्रदर्शनका लागि मद्धत पुग्ने छ ।’
नेपालले शनिबार वेस्ट इन्डिजसँग प्रतिस्पर्धा गर्दै छ । वेस्ट इन्डिजविरुद्धको खेल मुम्बई स्थित एमआईजी मैदानमा हुने छ ।