एजेन्सी – आयरल्यान्डमा आज देखि सुरु भएको तीन खेलको टि-२० शृंखलाको पहिलो खेलमा घरेलु टोलीले पाकिस्तानलाई स्तब्ध बनाएको छ । कोल्नटार्फ क्रिकेट क्लब डब्लिनमा शुक्रबार भएको खेलमा आयरल्यान्डले पाकिस्तानलाई‌ ५ विकेटले हराएको हो ।

पाकिस्तानले दिएको १ सय ८३ रनको लक्ष्य आयरल्यान्डले १ बल बाँकी छँदा ५ विकेट गुमाएर भेट्टायो । १९औं ओभरमा सेट ब्याटर एन्ड्रयू बालबर्नी आउट भएपछि केही कठिन देखिएको अवस्थाबाट क्रिजमा आएका कर्टिस क्याम्फरले आयरल्यान्डलाई जित दिलाए । पहिलो बलमा नै चौका प्रहार गरेका उनले अन्तिम ओभरमा पनि ११ रन चाहिएको अवस्थामा अर्को २ चौका प्रहार गर्दै जित दिलाए ।

बालबर्नीले ५५ बलमा सर्वाधिक ७७ रन बनाए । ह्यारी टेक्टरले २७ बलमा ३६ रन जोड्दा जर्ज डकरेलले २४ रन बनाए । क्यामफर ७ बलमा १५ रन बनाउँदै नटआउट रहे ।

पाकिस्तानका लागि अब्बास अफ्रिदीले २ विकेट लिए ।शाहिन अफ्रिदीले, नसीम शाह र इमाद वासिमले १-१ विकेट लिए ।

त्यसअघि टस हारेर ब्याटिङ गरेको पाकिस्तानले २० ओभरमा ६ विकेटको क्षतिमा १ सय ८२ रन जोड्यो । पाकिस्तानका कप्तान बाबर आजमले ४३ बलमा सर्वाधिक ५७ रन बनाए । सैम अयुबले ४५ रन बनाए । इफ्तिकर अहमदले ३७ रन जोडे ।

आयरल्यान्डका लागि क्रेज योङले २ तथा मार्क एडेयर र ग्यारेथ डिलेनीले १-१ विकेट लिए ।

शृंखलाको दोस्रो खेल आइतबार हुनेछ ।

आयरल्यान्ड र पाकिस्तान आउँदो टि ट्वान्टी विश्वकपमा एकै समूहमा छन् । यी दुई टोली रहेको समूह ए मा भारत, क्यानडा र अमेरिका पनि छन् ।