काठमाडौं (हाम्रो खेलकुद) – सुदूरपश्चिमसँग ३ विकेटले पराजित हुँदा बागमती प्रदेश रन रेटको आधारमा वीर गणेशमान सिंह राष्ट्रिय टी-ट्वान्टी च्याम्पिनसीपको लिग चरणबाट बाहिरिएको छ।

जितले बागमती अंक तालिकाको शीर्षस्थानमा रहँदै फाइनलमा पुग्ने थियो। तर हारले रन रेटको आधारमा बाहिरिएको हो। बागमतीको हारमा लुम्बिनी प्रदेश र कर्णाली प्रदेश फाइनलमा प्रवेश गर्न सफल भएका छन्।

कम स्कोर‌को प्रतिस्पर्धामा जितको लागि ७१ रनको विजय लक्ष्य पूरा गर्न सुदूरपश्चिमले पनि ७ विकेट गुमायो। १०.२ ओभरमा ७३ रन बनाउँदै सुदूरपश्चिमले बागमतीलाई माथ दिएको हो।

गजेन्द्र बोहरा र वसन्त खत्रीले १७/१७ रन जोड्दा नरेन साउदले १० रन बनाए। बलिङमा इशान पाण्डेले ३ र रिजन ढकालले २ विकेट लिए।

त्यसअघि पहिले ब्याटिङ गरेको बागमतीले अत्यन्त खराब ब्याटिङ गर्दा १९.१ ओभरमा सबै विकेट गुमाउँदै मात्र ७० रन बनायो। दशौं क्रमका सोनु देवकोटाले ३५ रन बनाउँदा अन्य कसैले पनि दोहोरो रन जोड्न सकेनन्।

बागमतीलाई ७० रनको लज्जास्पद योगफलमा रोक्न भोज राज भट्टले ४ ओभर बलिङ गर्दै १ मेडम सहित मात्र १२ रन खर्चेर ४ विकेट लिए। हेमन्त धामीले ३ विकेट आफ्नो नाममा लेखाए।

लुम्बिनी, कर्णाली र बागमती प्रदेशले समान ८/८ अंक जोडे। रन रेटमा लुम्बिनी शीर्षस्थानमा र कर्णाली दोस्रो स्थानमा रहँदै फाइनलमा पुगेका छन्।