मस्कट (हाम्रो खेलकुद) – कुवेतलाई हराउँदै ओमान समूह विजेता बन्दै एसिसि प्रिमियर कपको सेमिफाइनल प्रवेश गरेको छ । समूह चरणको अन्तिम खेलमा कुवेत माथि ४६ रनको जित निकाल्दै ओमान अन्तिम चारमा प्रवेश गरेको हो ।

ओमानले दिएको २०१ रनको विशाल लक्ष्य पछ्याएको कुवेतले २० ओभरमा ९ विकेट गुमाउँदै १५३ रन मात्र बनाउन सक्यो ।

कुवेतका लागि क्लिन्टो एन्टोले १५ बलमा सर्वाधिक ३४ रन बनाए । यस्तै बिलाल ताहिरले ३३ रन बनाउँदा मीत भवसरले २९ तथा रभिजा सान्दारुवनले २३ रन जोडे ।

ओमानका लागि जिशन मक्सुदले ४ विकेट लिए भने अकीब इलयासले ३ विकेट लिए । फयाज बटले र शकील अहमदले १-१ विकेट लिए ।

त्यसअघि अल अमेरातमा टस हारेर पहिले ब्याटिङ गरेको ओमानले २० ओभरमा ९ विकेट गुमाउँदै २०० रन बनायो । ओमानका लागि आयान खानले २० बलमा सर्वाधिक ४५ रन बनाए । यस्तै जिशन मक्सुदले ३५ तथा अकीबले ३४ रन जोडे । रफिउल्लाहले २३ रन बनाएर अविजित रहे ।

कुवेतका लागि अड्नान इदरीस र मोहम्मद अस्लामले २-२ विकेट लिए भने यासिन पटेलले र निमिश लतिफले १-१ विकेट लिए ।

जित सँगै ओमान ४ खेलमा ८ अंक सहित समूह विजेता बनेको छ । युएई ६ अंक सहित दोस्रो रहँदै सेमिफाइनलमा पुगेको छ । कुवेत ४ अंक सहित तेस्रो रह्यो भने बहराइनले २ र कम्बोडियाले बिना कुनै अंक प्रतियोगिता अन्त्य गरे ।

सेमिफाइनलमा ओमानले हङकङ विरुद्ध खेल्नेछ भने युएईले नेपाल विरुद्ध खेल्नेछ । सेमिफाइनलमा शुक्रबार हुनेछ ।