साउदीको हारसँगै हङकङ सेमिफाइनलमा

मस्कट (हाम्रो खेलकुद) – साउदी अरब नेपाल सँग पराजित भएसँगै हङकङ समूह ए मा दोस्रो रहँदै ओमनमा जारी एसिसि प्रिमियर कपको अन्तिम चारमा प्रवेश गरेको छ । समूह ए मा हङकङ कतारलाई नेट रनरेटमा पछि पार्दै समूह उपविजेता बन्दै सेमिफाइनलका लागि छनोट भएको हो ।

आफ्नो अन्तिम खेलमा मलेसिया माथि ७ विकेटको जित सहित हङकङले साउदी र नेपाल बीचको अन्तिम खेल अघि दोस्रो स्थान ओगटेको थियो । हङकङको ४ खेलमा ४ अंक सहित नेट रनरेट -०.१२८ रह्यो । कतारको ४ अंक नै भएपनि नेट रनरेट -०.४५३ रहेपछि तेस्रो स्थानमा रहँदै बाहिरियो ।

साउदीको नेट रनरेट राम्रो भएकाले नेपाल विरुद्ध जित नै सेमिफाइनलमा पुग्न पर्याप्त रहने थियो । तर नेपाल सँग ६ विकेटले पराजित भएपछि साउदी २ अंक मै सिमित भयो । मलेसिया २ अंक सहित पुछारमा रह्यो ।

यस्तै समूह बी मा शीर्ष दुई स्थानका लागि कडा प्रतिस्पर्धा रहेको छ । हाल ओमान र कुवेत भिड्दा युएईले कम्बोडियाको सामना गर्दैछ । ओमानको ६ अंक रहँदा कुवेत र युएईको ४-४ अंक छ । बहराइनका २ अंकमा रहँदै प्रतियोगिताबाट बाहिरिसकेको छन् । कम्बोडिया हालसम्म अंकविहिन छ ।

कुनै पनि टोलीले अन्तिम चारमा स्थान बनाएका छैनन् । जारी २ खेलको नतिजाले नेपाल र हङकङले सेमिफाइनलमा खेल्ने टोलीको टुंगो लाग्नेछ ।