मस्कट (हाम्रो खेलकुद) – ओमनमा जारी एसिसि प्रिमियर कपमा घरेलु टोलीमा ओमानले लगातार तेस्रो जित दर्ता गरेको छ । लगातार तेस्रो जित हासिल गर्ने क्रममा ओमानले युएई माथि ९ विकेटको सानदार जित निकालेको हो ।

वर्षाका कारण १५ ओभर प्रति टोलीमा घटाइएको खेलमा युएईले दिएको १४३ रनको लक्ष्य ओमानले १२.४ ओभरमै १ विकेट मात्र गुमाएर भेटायो ।

ओमानको जितमा कश्यप प्रजापति र खालिद कैलले अविजित रहँदै अर्धशतक जडे । कश्यपले ३८ बलमा ५ चौका र २ छक्का सहित ५३ रन बनाए भने खालिदले २३ बलमा २ चौका र ५ छक्का जडाई ५० रन बनाए । नसिम खुशीले १५ बलमा ३९ रन बनाएर आउट भएका थिए ।

युएईका अलि नासिरले ओमानको एकमात्र विकेट लिए ।

त्यसअघि अल अमेरात क्रिकेट मैदानमा टस हारेर व्याटिङको निम्तो पाएको युएईले १५ ओभरमा ५ विकेट गुमाउँदै १४२ रन बनायो ।

युएईका लागि आशिफ खानले ४५ बलमा ६ चौका र २ छक्का सहित ६६ रन बनाए भने कप्तान मुहम्मद वासिमले २५ बलमा ४५ रन बनाए । अन्य कुनै ब्याटरले दोहोरो अंक समेत बनाउन सकेनन् ।

ओमानका लागि बिलाल खानले ३ तथा कलिमुल्लाह र फायाज बटले १-१ विकेट लिए ।

समूह बी मा रहेको ओमानको ३ खेलमा ६ अंक भएको छ । युएई ३ खेलमा ४ अंक सहित तेस्रो स्थानमा छ । दोस्रो स्थानमा रहेको कुवेतको पनि ४ अंक छ । बहराइन र कम्बोडिया अंकविहिन छन् । समूहको शीर्ष दुई टोली सेमीफाइनलमा पुग्नेछन् भने प्रतियोगिताको विजेता एशिया कपका लागि छनोट हुनेछ ।