मस्कट (हाम्रो खेलकुद) – ओमानमा जारी एसिसि प्रिमियर कपमा हङकङ साउदी अरेबिया विरुद्ध स्तब्ध भएको छ । समूह ए अन्तर्गत अल अमेरातमा भएको खेलमा हंगकंगलाई साउदीले ५५ रनको हार चखाएको हो ।

साउदीले दिएको २ सय ३ रनको विशाल लक्ष्य पछ्याएको हङकङ १८.५ ओभरमा १ सय ४७ रनमा समेटियो । हङकङका लागि कप्तान निजाकत खानले ५१ बलमा ७ चौका र २ छक्का सहित सर्वाधिक ७३ रन बनाए । अंशुमन रथले १७ बलमा २३ रन जोडे । यस्तै जिशन अलिले १८ रन बनाए । अन्य ब्याटरले दोहोरो अंक छुन सकेनन् ।

साउदीका लागि उसमान नजिव र जेन अल अविदिनले समान ३ विकेट लिए । हिशाम शेखले २ तथा ईशतियाक अहमदले १ विकेट लिए ।

त्यसअघि टस जितेर पहिले ब्याटिङ गरेको साउदी अरबले ८ विकेट गुमाएर २ सय २ रन जोड्यो । साउदीका लागि अब्दुल वाहिदले ५१ बलमा सर्वाधिक ७७ रन बनाए । यस्तै मनान अलीले १८ बलमा ४४ रन जोडे । फैसल खानले ३० तथा हिशाम शेखले २२ रन जोडे ।

हङकङका लागि एहसान खानले ३ तथा एइजाज खानले २ विकेट लिए । यस्तै आयुष शुक्ला र रौनक कपूरले समान १ विकेट लिए ।

समूह ए मा साउदी, हङकङ र मलेसियाको समान २ खेलमा समान २ अंक नै रहेको छ । यस समूहमा कतार अंकविहिन छ । नेपालको २ खेलमा ४ अंक रहेको छ ।

समूह बी मा ओमान र युएईको समान २ खेलमा समान ४ अंक छ । कुवेतको २ अंक रहँदा बहराइन र कम्बोडिया अंकविहिन छन् ।