काठमाडौं (हाम्रो खेलकुद) – नेपाली राष्ट्रिय पुरुष क्रिकेट टोलीले आइसीसी टि२० विश्वकपमा प्रयोग गर्ने जर्सी सोमबार सार्वजनिक भएको छ ।

नेपाल क्रिकेट संघ (क्यान)ले राजधानीमा एक कार्यक्रमबीच जर्सी सार्वजनिक गरेको हो । युवा तथा खेलकुद मन्त्री विराजभक्त श्रेष्ठ र राष्ट्रिय खेलकुद परिषदका सदस्य सचिव टंकलाल घिसिङले जर्सी सार्वजनिक गरे । कार्यक्रममा क्यानका उपाध्यक्ष रोशन सिंह, सचिव पारस खड्का र केल्मी नेपालका निर्देशक उत्तम न्यौपानेको पनि उपस्थिति थियो ।

केल्मीले निर्माण गरेको जर्सीमा विगतभन्दा केही पृथक प्रयोग गरिएको छ । जर्सीको अगाडी काँधमा नेपालको झन्डा छ भने तल्लो भागमा सगरमाथा र गैंडा अंकित गर्ने डिजाइन छ । रातो र निलो रंगसँगै यसपटक पहेंलो रंग पनि जर्सीमा छ । केल्मी निर्देशक न्यौपानेले अन्तर्राष्ट्रिय क्रिकेटमा नेपालले वारियर (योद्धा) को रुपमा प्रदर्शन गरेकोले त्यसलाई पहेंलो रंगले इंगित गरेको बताए ।

मन्त्री श्रेष्ठले विश्वकपमा प्रयोग हुने जर्सी सार्वजनिक गर्ने अवसर पाउँदा गौरव महसुस गरेको बताए । सदस्य सचिव घिसिङले यो जर्सी नेपाली क्रिकेटको इतिहासमा कुंदिने भएकाले विशेष रहेको अभिव्यक्ति दिए ।

नेपालले वेस्ट इन्डिज ‘ए’ विरुद्ध हुने टि२० सिरिजमा यो जर्सी प्रयोग गर्नेछ । सचिव खड्काले विश्वकपअघि घरेलु मैदानमा हुने सिरिजमा जर्सी लगाउने बताएका थिए । कार्यक्रमपछि नै नेपाल र वेस्ट इन्डिज ‘ए’ खेल्ने जानकारी सार्वजनिक भएको थियो ।

यसै जुनमा हुने विश्वकपको आयोजना अमेरिका र वेस्ट इन्डिजमा हुँदैछ । २० राष्ट्र सम्मिलित विश्वकपको नेपाल समूह डी मा रहेको छ । नेपालसँगै समूहमा दक्षिण अफ्रीका, श्रीलंका, बंगलादेश र नेदरल्यान्ड्स रहेका छन् । नेपालले जुन ४ मा नेदरल्यान्ड्सविरुद्ध खेल्दै प्रतियोगिता सुरुवात गर्नेछ ।