7 months ago
April 2, 2024
इन्डियन प्रिमियर लिग (आइपिएल) ले भारतीय क्रिकेटमा नयाँ प्रतिभालाई विश्व क्रिकेटसामु स्थान दिँदै आएको छ । उक्त सुचिमा यस सिजन तीव्र गतिका बलर मयंक यादवको नाम थपिने पक्का भएको छ ।
लखनउ सुपर जायन्टसका लागि शनिबार पन्जाब किंग्सविरुद्ध डेब्यु गरेका युवा बलर मयंकले छोटो समयमै प्रभाव जमाएका छन् । डेब्युमै ३ विकेट लिएर प्लेयर अफ द म्याच घोषित उनले मंगलबार रोयल च्यालेन्जर्स बेंगलुरुविरुद्ध आफ्नो उच्च लयलाई कायम राखे ।
ग्लेन म्याक्सवेललाई आउट गरेका उनले क्यामरन ग्रीनलाई बोल्ड गरे । उनले ग्रीनको विकेट आफ्नो लागि उत्कृष्ट रहेको पनि बताए । मयंक लगातार दोस्रो खेलमा प्लेयर अफ द म्याच घोषित भए ।
शनिबार १ सय ५५ किलोमिटर प्रति घण्टा बलिङ गरेका उनले आफूलाई यस सिजन आइपिएलमा सबैभन्दा तीव्र गतिमा बल फ्याँक्ने बलरको रुपमा स्थापित गरे । मंगलबार उनले १ सय ५६ को आँकडा छुँदै आफ्नै रेकर्ड सुधारे ।
उनले मंगलबारको खेलमा १० पटक १ सय ५० किमी प्रति घण्टाको गति पार गरे । नियमित रुपमा तीव्र गतिको बल फाल्ने उनले आफ्नो लाइन र लेन्थमा पनि पकड जमाउन सकेका छन् । विगतमा भारतले गति भएका बलर पाएपनि उनीहरुले आफ्नो बलिङमा नियन्त्रण राख्न सकेका थिएनन् । तर मयंक फरक देखिएका छन् ।
मयंकले आफ्नो प्रदर्शनको कारण आफ्नो खानपिन, निन्द्रा र प्रशिक्षणको मिहिनेत रहेको बताए । ‘तीव्र गतिमा लगातार बल फाल्न सहज छैन । तर मैले मेरो खानपिनमा निकै ध्यान दिएको छु । त्यसपछि निन्द्रा र प्रशिक्षणमा पनि समय मिलाएको छु । यसले गर्दा नै यो सम्भव भएको छ,’ बेंगलुरुविरुद्ध जितपछि उनले भने ।
लखनउले सन् २०२२ को मेगा अक्सनमा मयंकलाई न्युनतम २० लाख भारतीय रुपैयाँमा खरिद गरेको थियो । त्यसबेला टोलीको सहायक प्रशिक्षक रहेका विजय धैयले उनलाई नेटमा बलिङ गरेको देख्दा प्रभवित भएर अनुबन्ध गर्न टोलीमा भनेका थिए । उनले भविष्यमा राम्रो हुने सम्भावना देखेर मयंकलाई टोलीमा राखेको बताए ।
तर सन् २०२२ मा अवसर नपाएका मयंकले २०२३ मा चोटका कारण खेल्न पाएनन् । २०२४ मा दोस्रो खेलमा डेब्युको अवसर पाएका मयंकले पहिलो खेलमै प्रभाव जमाए । पछिल्लो सिजन घरेलु क्रिकेटमा पनि राम्रो प्रदर्शन गरेका उनलाई लखनउले अवसर दिएको थियो । बलिङ प्रशिक्षक मोर्ने मोर्केलसँग मयंकले काम गरिरहेका छन् ।
दिल्लीको सोनेट क्लबबाट आफ्नो करिअर सुरु गरेका उनलाई स्वर्गीय तारक सिन्हा र देवेन्द्र शर्माले सुरुवाती प्रशिक्षण दिएका थिए । दिल्लीमा सुरुवातमा अवसर नपाएपनि उनले पछिल्लो घरेलु सिजनमा भने राम्रो प्रदर्शन गरेका थिए ।
मयंकको प्रदर्शनबाट विश्व क्रिकेटमा तीव्र गतिका बलरमा उत्कृष्ट मानिने ब्रेट ली र डेल स्टेनले पनि सामाजिक संजालमार्फत प्रशंसा गरेका छन् । मंगलबार विपक्षी कप्तान फाफ डु प्लेसिसले पनि मयंकको गति र बलमा नियन्त्रणको प्रशंसा गरे ।
निरन्तर १ सय ५० किमी प्रति घन्टाको गति । लाइन र लेन्थमा सटिक नियन्त्रण । पेस बलिङ खेल्न माहिर अष्ट्रेलियाका ब्याटरलाई समस्या दिन सक्ने खुबी । र लगातार दुई खेलमा प्लेयर अफ द म्याच । मयंक भारतीय क्रिकेटका उदियमान स्टार हुन् ।
जसप्रित बुमराहमा निकै निर्भर रहेको भारतीय तीव्र गतिको बलिङले यसपटक आइपिएलमार्फत अर्को प्रतिभा भेटेको छ । यस्तै प्रदर्शन निरन्तर रहे मयंकले आगामी जुनमा हुने टि२० विश्वकप खेल्ने चर्चा सर्वत्र छ । र सम्भावना पनि बलियो देखिन्छ ।
एजेन्सीको सहयोगमा सुबास हुमागाईंको प्रस्तुति
October 29, 2024
काठमाडौं(हाम्रो खेलकुद) – ओपनर इमरान शेखको अर्धशतकमा मधेश प्रदेशले नरेश मेमोरियल यु १९ राष्ट्रिय क्रिकेट प्रतियोगितामा दोस्रो जित निकालेको छ । तेस्रो खेलमा दोस्रो जित निकाल्ने क्रममा मंगलवार मधेशले बागमती प्रदेशमाथि ४६ रनको जित हात पारेको छ । १ सय ४२ रनको लक्ष्य पछ्याएको बागमतीले ३९.४ ओभरमा अल आउट हुदै ९६ रन मात्र बनाउन सक्यो […]
October 29, 2024
काठमाडौं(हाम्रो खेलकुद) – नरेन साउदको सानदार बलिङमा सुदूरपश्चिमले नरेश मेमोरियल यु १९ राष्ट्रिय क्रिकेट प्रतियोगितामा पहिलो जित निकालेको छ । प्रतियोगिताको दोस्रो खेलमा पहिलो जित निकाल्ने क्रममा सुदूरपश्चिमले मंगलवार कर्णाली प्रदेशलसई ५ विकेटले हराएको छ । ७५ रनको लक्ष्य सुदूरपश्चिमले १८.१ ओभरमा ५ विकेट गुमाएर पूरा गर्यो । सुदूरपश्चिमका नरेन भट्टले सर्वाधिक २८, युवराज खत्रीले […]
October 29, 2024
काठमाडौं(हाम्रो खेलकुद) – १९औं द हङकङ क्रिकेट सिक्सेसमा नेपालसँग खेल्ने इङ्ग्ल्याण्डको टोली घोषणा भएको छ । हङकङ सिक्सेसले प्रतियोगितामा सहभागिता जनाउने ७ सदस्यीय इङ्ग्ल्याण्ड टोलीको मंगलवार घोषणा गरेको हो । इङग्ल्याण्डको कप्तानी अलराउन्डर रवि भोपाराले गर्नेछन् । नेपालले आफ्नो पहिलो खेलमा कात्तिक १६ गते इङ्ग्ल्याण्डसँग खेल्नेछ । द हङकङ क्रिकेट सिक्सेसमा नेपाल, अस्ट्रेलिया र इङ्ग्ल्याण्ड […]