चितवन (हाम्रो खेलकुद)- मधेश प्रदेश र भारतीय टोली तालतला इन्स्टिटाइट कोलकाता चितवनको भरतपुरमा जारी इण्डो–नेपाल टि‌ ट्वान्टी च्याम्पियनसिप क्रिकेटको‌ फाइनलमा भिड्ने भएका छन्।

गौतमबुद्ध अन्तर्राष्ट्रिय क्रिकेट रंगशालाको नमुना मैदानमा शुक्रबार भारतको क्षेत्रीय टोली पिएसआरए ग्रुप लखनउलाई २ विकेटले पराजित गर्दै मधेश फाइनलमा पुगेको हो।

जितको लागि लखनउले दिएको १ सय ४८ रनको लक्ष्य मधेशले १९.४ ओभरमा ८ विकेट गुमाउँदै पूरा गर्यो । मधेशलाई जित्न अन्तिम ओभरमा ११ रनको आवश्यकता थियो ।

अन्तिम ओभरको पहिलो बलमा प्रदिप पासवान रन आउट भए । दोस्रो बलमा अभिषेक तिवारीले रन जोड्न सकेनन् । तेस्रो र चौथो बलमा तिवारीले लगातार दुई छक्का प्रहार गर्दै मधेशलाई महत्त्वपूर्ण जित दिलाए ।

मधेशका लागि तिवारीले १४ बलमा नटआउट २३ रन बनाए । उनले २ चौका र २ छक्का प्रहार गरे । यस्तै रोहन वि.क.ले ५० बलमा ८३ रन बनाए । उनले ६ चौका र ६ छक्का नै प्रहार गरे । उनकै महत्वपूर्ण इनिङले मधेशले बलियो टोली लखनउलाई पराजित गर्न सफल भयो । मधेशका अन्य ब्याटरले भने राम्रो प्रदर्शन गर्न सकेनन् ।

लखनउका लागि प्रिन्स शाहीले ४ ओभरमा १६ रन खर्चिएर ५ विकेट लिए । मोहम्मद सरिम र कार्तिक यादवले समान १ विकेट लिए ।

यसअघि पहिले ब्याटिङ गरेको लखनउले ८ विकेटको क्षतिमा १ सय ४७ रन बनाएको थियो । उसका लागि सन्दीप मितलले २६ बलमा ३६ रन, निखिल रावले २२ बलमा २३ रन बनाए ।

मधेशका भुलन सहनीले ४ ओभरमा १५ रन खर्चिदै ३ विकेट लिए । विशाल पटेल र अभिषेक तिवारीले समान १ विकेट लिए । मधेशका रोहन वि.क.प्लेयर अफ दि म्याच घोषित भएका थिए। लखनउ शीर्ष स्थान र मधेश चौथो स्थानमा रहँदै सेमिफाइनल पुगेको थियो।मा रहेर सेमीफाइनलमा स्थान बनाएको थियो ।

शुक्रबार नै भएको दोस्रो सेमिफाइनलमा सुदूरपश्चिम प्रदेशलाई ७ विकेटले पराजित गर्दै अर्को भारतीय टोली तालतला इन्स्टिटाइट कोलकाताले उपाधि नजिक पुगेको हो।
१ सय ४५ रनको लक्ष्य कोलकाताले १५.३ ओभरमा ३ विकेट गुमाउँदै १ सय ५० रन बनाएर जित हासिल ग¥यो । कोलकातालाई सहज जित दिलाउन विकास चौधरीले ७१ रनको विष्फोटक इनिङ खेले । उनले ४२ बलमा ५ छक्का र ६ चौका प्रहार गरे ।

रमन कदयनले ३७ बलमा ३ छक्का र ७ चौकाको मद्धतमा ६० रन तथा कुनाल नगरले ६ बलमा १३ रन बनाए । सुदूरपश्चिमका लागि नरेन साउद २ र दीपक बोहोराले १ विकेट लिए ।

त्यसअघि पहिले ब्याटिङ गरेको सुदूरपश्चिम प्रदेश १ सय ४४ रनमा अलआउट भएको थियो । सुदूरपश्चिमका लागि खडक बोहोराले सर्वाधिक ५८ रन बनाए । उनले ४३ बलमा १ छक्का र ६ चौका प्रहार गरे । बसन्त कार्कीले १९ बलमा ३४, दीपक बोहोराले १३ बलमा १५ रन बनाए ।

कोलकाताका सन्दीप गुप्ताले ३ ओभरमा १६ रन खर्चिदै महत्वपूर्ण ४ विकेट लिए । शौरभ यादवले ४ ओभरमा २१ रन खर्चिदै ३ विकेट लिए । अभिषेक सिंह, प्रशान्त र मिलन यादवले समान १ विकेट लिए । खेलमा कोलकाताका विकास चौधरी प्लेयर अफ दि म्याच घोषित भए । फाइनल शनिबार हुनेछ ।