काठमाडौं (हाम्रो खेलकुद) – नेक्सस क्रिकेट एकेडेमीले यस बर्ष एसईई दिने २ सय जना विद्यार्थीका लागि २० दिने निशुल्क क्रिकेट क्याम्प आयोजना गर्ने भएकाे छ ।

काठमाडौंको पेप्सीकोलामा अवस्थित एकडेमीले ग्रासरूट क्रिकेट विकासमा काेषेढुङगा सावित हुँदै आएको यस क्याम्पलाई निरन्तरता दिन लागेको हो । नेक्ससले यस क्याम्पको पाँचौ संस्करण २०८० चैत्र २८ गते देखि २०८१ वैशाख १८ गतेसम्म मुलपानी क्रिकेट रंगशाला र एकेडेमीको प्राङ्गणमा संचालन गर्न लागेकाे हो ।

क्याम्पमा सहभागी हुन इच्छुक विद्यार्थीहरुले अनलाइन फारम भर्नुपर्ने छ । फारम भर्ने पहिलाे २ सय जनालाई क्याम्पमा सहभागी गराईने एकेडेमीले जनाएको छ ।

क्याम्पमा पाकिस्तानकाे पहिलाे श्रेणी क्रिकेट खेलेका पाकिस्तान क्रिकेट बाेर्डबाट लेभल १ गरेका प्रशिक्षक इम्तियाज हुसेन र नेपाली क्रिकेटका वरिष्ठ प्रशिक्षकहरूले प्रशिक्षक दिनेछन् ।एकडेमीका अध्यक्ष भरत कुमार शाहीले क्याम्पमा हरेक खेलाडीले १० खेल खेल्ने अवसर पाउने पनि जानकरी दिए ।

यसअघि क्याम्पको पहिलो संस्करणमा हाल नेपालकाे यू१९ टोलीमा विकेटकिपर रहेका उत्तम थापा मगर र तेस्रो संस्करणबाट यू१६ टोलीका अशाेक धामी सहभागी थिए । यसबाहेक दर्जन बढी खेलाडीले घरेलु क्रिकेटमा छाप बसाएको एकेडेमीको दावी छ ।