काठमाडौं (हाम्रो खेलकुद) – पाँचपोखरी टी–२० जिल्लास्तरीय क्रिकेट प्रतियोगिताको छैटौँ संस्करण काठमाण्डौको मुलपानीमा शनिबार सुरु भएको छ ।

पहिलो खेलमा साविक विजेता ह्योल्मो ११ ले चौतारा साँगाचोकगढी नगरपालिकालाई १ सय २७ रनको विशाल रनले हरायो ।ह्योल्मो ११ का लागि खेलको म्यान अफ दी म्याच विनोद तामाङले ७२ रनको अर्धशतकीय पारी खेलेका थिए ।

दोश्रो खेलमा पाँचपोखरी क्रिकेट क्लबले इन्द्रावती गाउँपालिकालाई ४ विकेटले पराजित गरेको छ । टस जितेर ब्याटिङ गरेको इन्द्रावतीले निर्धारित ओभरमा ९ विकेट गुमाएर ९४ रन बनाएको थियो । पाँचपोखरीका लागि विजयकुमार धितालले ४ ओभरमा ११ रन खर्चिएर ३ विकेट लिएका थिए ।

जवाफी व्याटिङ गरेको पाँचपोखरीले १८.२ ओभरमा ६ विकेट गमाएर ९७ रन बनाएको थियो । इन्द्रावतीका लागि शुसन चौलागाई र एकनाथ नेपालले समान २ विकेट लिए । खेलको म्यान अफ दि म्याच पाँचपोखरीका विवेक रानामगर भए ।

त्यसअघि पाँचपोखरी थाङपाल गाउँपालिकाका अध्यक्ष टासी लामाले प्रतियोगिताको उद्घाटन गरे । मैत्रिपुर्ण उद्घाटन खेलमा जनप्रतिनिधिको टोली विजयी भएको थियो । जनप्रतिनिधि टोलीले कर्मचारी टोलीलाई ४ रनले पराजित गरेको थियो ।

प्रतियोगित फागुन १९ गते सम्म चल्ने प्रतियोगिताको विजेताले १ लाख र दोस्रो टोली ५० हजार रुपैयाँ प्राप्त गर्नेछन् ।