काठमाडौं (हाम्रो खेलकुद) – नेपालको सिनियर राष्ट्रिय क्रिकेट टोलीले टि२० विश्वकपको तयारीस्वरूप भारतको स्टेट टोलीसँग प्रतियोगिता खेल्ने भएको छ ।

नेपाल क्रिकेट संघ (क्यान) ले सोमबार सार्वजनिक गरेको तालिका अनुसार नेपालको राष्ट्रिय टोलीसँगै बरोडा र गुजरात क्रिकेट संघको टोलीले त्रिकोणात्मक टि२० प्रतियोगिता खेल्नेछन् । उक्त प्रतियोगिता मार्च ३१ देखि अप्रिल ७ सम्म चल्नेछ ।

क्यानका क्रिकेट म्यानेजर विनोद दासका अनुसार नेपालको सिनियर राष्ट्रिय क्रिकेट टोलीले नै उक्त प्रतियोगिता खेल्नेछ । टि२० विश्वकपको लागि तयारी गर्ने लक्ष्यसहित प्रतियोगितामा नेपालले सहभागिता जनाएको हो । भारतमा हुने प्रतियोगिता ओमानमा अप्रिल १० देखि सुरु हुने एसीसी प्रिमियर कपको तयारीको रुपमा पनि रहनेछ ।

नेपालको सिनियर टोलीले फेब्रुअरी २७ देखि मार्च ५ सम्म टियु मैदानमा नेदरल्यान्ड्स र नामिबियासँग सिरिज खेल्दैछ । त्यसपछि टोली हङकङ प्रस्थान गर्ने कार्यक्रम रहेको छ । त्यहाँ ओमान, पिएनजी र स्थानीय टोलीसँग क्वाड्रान्गुलर सिरिज खेलेपछि नेपाल भारत प्रस्थान गर्नेछ ।

टि२० विश्वकप जुन १ देखि अमेरिका र वेस्ट इन्डिजमा सुरु हुँदैछ । नेपाल रहेको समूह ‘डी’ मा दक्षिण अफ्रीका, श्रीलंका, बंगलादेश र नेदरल्यान्ड्स छन् ।