हिमाल खरेल,बिर्तामोड
बिर्तामोड नगरपालिका र कचनकवल गाउँपालिका प्रथम झापा जिल्ला अन्तरपालिका टि–२० पुरुष क्रिकेट प्रतियोगिताको सेमिफाइनल प्रवेश गरेका छन् ।

बर्खा स्मृति प्रतिष्ठान बुद्धशान्तिको आयोजनामा जारी प्रतियोगितामा सोमबार तेस्रो क्वार्टर फाइनलमा बिर्तामोडले भद्रपुर नगरपालिकालाई ५ रनले पराजित गरेको छ ।

पहिले ब्याटिङ राजेको बिर्तामोडले निर्धारित २० ओभरमा ८ विकेट गुमाउँदै १ सय ५४ रनको योगफल बनाएको थियो ।

१ सय ५५ रनको लक्ष्य पछ्याएको भद्रपुरले निर्धारित २० ओभरमा ९ विकेट गुमाउँदै १ सय ४९ रन मात्र बनाउन सक्यो ।

बिर्तामोडका लागि ४ ओभर बलिङ गर्दै १६ रन दिएर ५ विकेट लिएका सुमित न्यौपाने खेलको प्लेयर अफ दि म्याच घोषित भए ।

त्यस्तै, अन्तिम क्वार्टर फाइनल खेलमा कचनकवल गाउँपालिकाले कमल गाउँपालिकालाई ३ विकेटले जित्यो ।

पहिले ब्याटिङ रोजेको कमलले निर्धारित २० ओभरमा ७ विकेट गुमाउदै १ सय ६६ रन बनाएको थियो ।

१ सय ६७ रनको लक्ष्य पछ्याएको कचनकवलले ७ विकेट गुमाउँदै १८.१ ओभरमा लक्ष्य प्राप्त गर्यो । कचनकवलका लागि ४० बलमा ६९ रन बनाएका रोशन चौहान खेलको प्लेयर अफ दि म्याच घोषित भए ।
फागुन ९ गतेको पहिलो सेमिफाइनलमा मेचीनगर नगरपालिका र कचनकवल गाउँपालिका प्रतिस्पर्धा गर्ने छन् ।

फागुन १० गते दोस्रो सेमिफाइनल खेल बिर्तामोड नगरपालिका र गौरादह नगरपालिकाबीच हुनेछ ।
झापाका १५ वटै पालिकाको सहभागिता रहेको प्रतियोगितामा विजेता टोलीले १ लाख‌ र ५० हजार रुपैया प्राप्त गर्नेछ ।