काठमाडौं (हाम्रो खेलकुद) – रुपन्देहीको तिलोत्तमामा निर्माणाधीन एक्स्ट्राटेक ओभल अन्तर्राष्ट्रिय क्रिकेट मैदानको उद्घाटन दुई साता पछि सरेको छ । अब फागुन २८ गते उद्घाटन हुने भएको छ । यसअघि फागुन १४ गते गर्ने भनिएका छन् ।

काठमाडौंमा चलिरहेको आइसीसी विश्वकप लिग २ र त्यसपछि हुने टि–२० क्रिकेट सिरिजका कारण नेपाल क्रिकेट संघ (क्यान) का पदाधिकारी र केही पूर्व क्रिकेटर फागुन १४ गते सहभागी हुन नसक्ने अवस्था सिर्जना भएपछि कार्यक्रम २८ गतेका लागि सारिएको हो ।

एक्स्ट्राटेक ओभलका निर्देशक विनोद कुँवरले सोमवार विज्ञप्ति निकालेर उद्घाटन कार्यक्रम सारिएको जानकारी दिएका छन् । उनले सार्नुको कारण कार्यक्रमलाई भव्य र सफल पार्नु नै रहेकोले त्यसै अनुसार बुझिदिन अनुरोध गरेका छन् ।

उद्घाटनको दिन ४टोलीबीच तिलोत्तमा एक्स्ट्राटेक लेजेण्ड्स कप क्रिकेट प्रतियोगिता हुने यसअघि नै सार्वजनिक भइसकेको छ । यसमा नेपालको पहिलो अन्तर्राष्ट्रिय खेल खेलेको १९९६ को टोली, रुपन्देही लेजेन्ड्स, सन् २०१४ को टि विश्वकप खेलेको टोली र रेस्ट अफ नेपाल गरेर ४ टोलीले सहभागिता रहने बताइएको छ ।

क्यानका सचिव पारस खड्काले २०१४ टोलीको कप्तानी गर्नेछन् । १९९६ को कप्तानमा एलबी क्षेत्री, रेस्ट अफ नेपालमा कलाम अली तथा रुपन्देही लेजेन्ड्समा हरिबहादुर थापा कप्तान रहनेछन् ।

हाल अष्ट्रेलियाको सिडनीमा बस्दै आएका गुल्मीका युवा व्यवसायी कुँवरले रुपन्देहीको तिलोत्तमा नगरपालिका १७ मा ४० करोड रुपैयाँ भन्दा बढीको लगानीमा एक्स्ट्राटेक ओभल रंगशाला बनाईरहेका छन् ।