धनगढी (हाम्रो खेलकुद) – लिटिल फ्लावर स्कुलले दीपेन्द्र श्वार मोमेरियल डिसिए कपको उपाधि जितेको छ ।
फाप्ला क्रिकेट मैदानमा शनिबार भएको फाइनलमा थ्रीस्टार स्कुललाई ७ विकेटले पराजित गर्दै लिटिल फ्लावर च्याम्पियन बनेको हो ।

थ्रीस्टारले दिएको ६७ रनको लक्ष्य लिटिल फ्लावरले ११.१ ओभरमा ३ विकेट गुमाई भेट्टायो । त्यसअघि थ्रीस्टारले टस जितेर पहिले ब्याटिङ गर्दै १६ ओभरमा सबै विकेट गुमाएर ६६ रन बनाएको थियो । कमल ढकालले २५ बलमा २३ रन तथा यस्तै अनिल यादिले ९ रन बनाए ।

लिटिल फ्लावरका रोशन रावलले ४ ओभरमा १ ओभर मेडन राख्दै १८ रन दिएर ४ विकेट लिए । रोशन खेलको म्यान अफ द म्याच चुनिए । जवाफी ब्याटिङमा आएको लिटिल फ्लावरका यश कुमार कठायतले २१ बलमा ४ चौकाको मद्दतमा २८ रन तथा रोशन रावलले ८ रन प्रहार गरे । थ्रीस्टारका किरन शाहु र पर्वत साउँदले समान १ विकेट लिए ।

धनगढी क्रिकेट एकेडेमी(डिसिए)को आयोजनामा भएको प्रतियोगिताको विजेता लिटिल फ्लावरले ५० हजार रुपैयाँ प्राप्त गरेको छ । विजेता टोलीका खेलाडीले डिसिएमा २ महिनाको छात्रवृत्तीमा प्रशिक्षण पाउँने छन् । उपविजेता थ्री स्टार स्कुलले ३० हजार रुपैयाँसहित खेलाडीहरुले डिसिएमा २ महिनाको छात्रवृत्ती पाउनेछन् ।

प्रतियोगिताको सर्वोत्कृष्ट खेलाडी स्टेपिङ स्टोन स्कुलका मनिष कुँवर घोषित भए । उनले नगद ५ हजारसहित २ महिनाको छात्रवृत्ती पाए । उत्कृष्ट ब्याटर स्टेपिङ स्टोनकै किरन धामी र उत्कृष्ट बलर लिटिल फ्लावरका रोशन रावल घोषित भए । दुबै जनाले समान ३ हजार रुपैयाँ सहित २ महिनाको छात्रवृत्ती पाएका छन् ।

उदीयमान खेलाडी घोषित सुदर्शन पन्तले १ हजार नगदसहित डिसिएमा २ महिनाको छात्रवृत्ती पाए । प्रतियोगितालाई दीपु सोसाइटी, एसपीए कलेज, एभरेष्ट बैंक, एनएमबी बैंक, गुरुकुल एकेडेमी, हाम्रो सहायक, ब्रेड बक्स द बेकरी क्याफेसाथ दिएका थिए ।
योसँगै यसवर्ष डिसिएले तीनवटा विद्यालयस्तरीय प्रतियोगिता सम्पन्न गरिसकेको छ । यसअघि डिसिएले स्टेपिङ स्टोन जुनियर कप, ग्रेस इन्टरनेसनल प्रिसेन्स कप आयोजना गरेको थियो ।