काठमाडौं (हाम्रो खेलकुद) – आइसीसी क्रिकेट विश्वकप लिग-२ अन्तर्गत दोस्रो खेलमा नेपालले नेदरल्यान्ड्सलाई हराउँदा कुशल भुर्तेल प्लेयर अफ द म्याच घोषित भएका छन् ।

टियु क्रिकेट मैदानमा कुशलको अलराउन्ड प्रदर्शनमा नेपालले ९ विकेटको सानदार जित दर्ता गरेको हो । कुशलले बलिङतर्फ ४ विकेट लिँदा ब्याटिङमा पनि नेपाललाई आक्रामक सुरुवात दिलाएका थिए । कुशलले ११ बलमा २८ रन जोडे ।

दोस्रो ओभरमै कुशलले आर्यन दत्तलाई २ छक्का र एक चौका प्रहार गर्दै आक्रामक सुरुवात दिलाए । तेस्रो ओभरमा किंगमाविरुद्ध पनि भुर्तेलले १ चौका र १ छक्का प्रहार गरे । उक्त ओभरको पाँचौ बलमा ठूलो सट खेल्ने प्रयासमा कुशल क्याच आउट भए ।

त्यसअघि उनले नेदरल्यान्ड्सको मध्यक्रमलाई धराशायी पार्ने क्रममा ४ विकेट लिएका थिए । भुर्तेलले २७ औं ओभरमा वेस्ली बरेसीलाई क्याच आउट गराएपछि नेदरल्यान्ड्स ९९-६ को अवस्थामा पुग्यो । आर्यन दत्त १० रन जोड्दै कुशल भुर्तेलको बलमा ठूलो सट खेल्ने धुनमा क्याच आउट भए ।

ड्रिंक्सलगत्तै ३५ औं ओभरमा सर्वाधिक ३३ रन जोड्दै स्कट एडवार्ड्स पेभेलियन फर्किए । ४९ बलमा १ चौका प्रहार गर्दै संयमित इनिङ खेलेका उनी नवौं विकेटको रुपमा कुशल भुर्तेलको एलबीडब्लु धरापमा परे । भुर्तेलले नै किंगमालाई २ रनमा कट बिहाइन्ड गरेपछि नेदरल्यान्ड्स अलआउट भयो ।