हिमाल खरेल, बिर्तामोड

प्रथम झापा जिल्ला अन्तरपालिका टि–२० पुरुष क्रिकेट प्रतियोगितामा गौरादह नगरपालिका र कमल गाउँपालिका विजयी भएका छन् ।

बर्खा स्मृति प्रतिष्ठान बुद्धशान्तिको आयोजनामा जारी प्रतियोगितामा शुक्रबार पहिलो खेलमा गौरादहले झापा गाउँपालिकालाई ४६ रनले पराजित गरेको छ । पहिले ब्याटिङ राजेको गौराहदहले निर्धारित २० ओभरमा ८ विकेट गुमाउँदै १ सय ७८ रन बनाएको थियो ।

१ सय ७९ रनको लक्ष्य पछ्याएको झापा गाउँपालिकाले २० ओभरमा ६ विकेट गुमाउँदै १ सय ३२ रन मात्रै बनाउन सक्यो । गौरादहका लागि ४० रन बनाएका सक्सेस तिम्सिना प्लेयर अफ दि म्याच घोषित भए ।

त्यस्तै, दोस्रो खेलमा शिवसताक्षी नगरपालिकाविरुद्ध कमल गाउँपालिका २५ रनले विजयी भएको छ । पहिले ब्याटिङ गरेको कमल गाउँपालिकाले निर्धारित २० ओभरमा ८ विकेट गुमाउँदै १ सय ६० रन बनाएको थियो ।

१ सय ६१ रनको लक्ष्य पछ्याएको शिवसताक्षी नगरपालिकाले ६ विकेट गुमाउँदै १ सय ३५ रन मात्रै बनाउन सक्यो । कमल गाउँपालिकाका लागि ४ ओभरमा १३ रन दिएर २ विकेट लिएका रुपक बराल प्लेयर अफ दि म्याच घोषित भए । शिवसताक्षिका लागि सन्दिप पौड्यालले ४१ रन जोडेका थिए ।

प्रतियोगितामा शनिबार पहिलो खेल भद्रपुर नगरपालिकाविरुद्ध दमक नगरपालिका र दोस्रो खेल अर्जुनधारा नगरपालिकाविरुद्ध कचनकवल गाउँपालिकाबीच हुनेछ ।

झापाका १५ वटै पालिकाको सहभागिता रहेको प्रतियोगितामा विजेताले १ लाख र दोस्रो टोलीले ५० हजार रुपैयाँ प्राप्त गर्नेछन् ।