हिमाल खरेल, मेचीनगर

प्रथम झापा जिल्ला अन्तरपालिका स्तरीय पुरुष टि २० क्रिकेट प्रतियोगितामा बिहीबार गौरीगञ्ज र मेचीनगर विजयी भएका छन् ।

पहिलो खेलमा गौरीगञ्ज गाउँपालिकाले हल्दिबारी गाउँपालिकालाई ६१ रनले पराजित गर्यो । पहिले ब्याटिङ रोजेको गौरीगञ्जले निर्धारित २० ओभरमा ४ विकेट गुमाउँदै १ सय ५५ रन जोडेको थियो ।

१ सय ५६ रनको लक्ष्य पछ्याएको हल्दिबारी १८ ओभरमा ९४ रन बनाउँदै अलआउट भएको थियो । गौरीगञ्जका लागि ५ विकेट लिएका छविलाल खड्का प्लेयर अफ दि म्याच घोषित भए ।

त्यस्तै, दोस्रो खेलमा बुद्धशान्ति गाउँपालिकाविरुद्ध मेचीनगर नगरपालिका ६० रनले विजयी भयो । पहिले ब्याटिङ गरेको मेचीनगरले निर्धारित २० ओभरमा ८ विकेट गुमाउँदै २ सय १५ रन बनाएको थियो ।

२ सय १६ रनको विशाल लक्ष्य पछ्याएको बुद्धशान्ति गाउँपालिका ८ विकेट गुमाउँदै १ सय ५५ रनमा सीमित भयो । मेचीनगरका लागि ३० बलमा ७८ रन बनाएका विराट डाँगी प्लेयर अफ दि म्याच घोषित भए ।

बुद्धशान्तिका लागि पर्शुराम पौडेलले ३ विकेट लिएका थिए । सो टोलीका लागि आदिहाङ फागोले ४४ रन बनाए
।

बर्खा स्मृति प्रतिष्ठान बुद्धशान्तिको आयोजनामा जारी प्रतियोगितामा झापाका १५ वटै पालिकाको सहभागिता रहेको छ । प्रतियोगिताको विजेता टोलीले १ लाख दोस्रो हुने टोलीले ५० हजार रुपैयाँ प्राप्त गर्ने प्रतिष्ठानका अध्यक्ष मदनकुमार प्रसाईंले बताए ।