काठमाडौँ (हाम्रो खेलकुद) – पाँचपोखरी थाङपाल गाउँपालिका खेलकुद विकास समितिको आयोजनामा छैठौं पाँचपोखरी टि-२० जिल्ला स्तरीय क्रिकेट प्रतियोगिता २०८० फाल्गुन १२ देखि १९ गतेसम्म मुलपानी क्रिकेट स्टेडियममा हुने भएको छ । खेलकुद विकास समितिले एक प्रेस विज्ञप्ति जारी गरी प्रतियोगिताको बारेमा जानकारी दिएको हो ।

सिन्धुपाल्चोक जिल्लाबाट राष्ट्रिय तथा अन्तर्राष्ट्रिय स्तरका खेलाडी उत्पादन गर्ने उद्देश्य रहेको आयोजकको विज्ञप्तिमा उल्लेख छ । प्रतियोगितामा सिन्धुपाल्चोक जिल्लाका ८ वटा टिम सहभागिता रहनेछ । प्रतियोगितामा सिन्धुपाल्चोक जिल्ला क्रिकेट संघ र पाँचपोखरी क्रिकेट क्लबको प्राविधिक सहयोग रहेको छ ।

उक्त टिममा सिन्धुपाल्चोक जिल्लाबासी मात्र रहने प्रावधानलाई निरन्तरता दिइएको भएता पनि यस वर्षदेखि अन्तर्राष्ट्रिय प्रतियोगितामा सहभागीता जनाइसकेका उमेर समूह तथा सिनियर टिमबाट खेलिसकेका १ जना खेलाडीलाई टिममा सहभागी गराउन सक्ने प्रावधान समेत रहेको छ ।

प्रतियोगिताको सम्पूर्ण तयारी पूरा भएको समेत आयोजकले जानकारी दिएको छ ।प्रतियोगितामा विजेता र उपविजेता हुने टिमले क्रमशः रु. १ लाख र ५० हजार नगद, ट्रफी, प्रमाणपत्र, मेडलका साथै प्रतियोगिताभरीकै सर्वोत्कृष्ट खेलाडी, उत्कृष्ट ब्याट्सम्यान, उत्कृष्ट बलर र उत्कृष्ट अलराउण्डरलाई ट्रफी तथा प्रमाणपत्र प्रदान गरिनेछ ।

सर्वोत्कृष्ट खेलाडीलाई ग्रेट हिमालयन क्रिकेट एकेडेमीले एक वर्ष र उत्कृष्ट बलर एवं उत्कृष्ट व्याट्सम्यानलाई ६ महिना निःशुल्क क्रिकेट प्रशिक्षण प्रदान गर्नेछ ।

प्रतियोगिताको सेमिफाइनल र फाइनल खेल प्रत्यक्ष प्रसारण समेत हुने छ । प्रतियोगिता चैत्र ३ सम्म चल्ने छ ।