एजेन्सी – लगातार दोस्रो जित निकाल्दै अष्ट्रेलियाले वेस्ट इन्डिज विरुद्धको टि-२० शृंखलामाथि एक खेल बाँकी रहँदै कब्जा गरेको छ । दोस्रो टि-२० मा ३४ रनको जित निकाल्दै अष्ट्रेलियाले तीन खेलको शृंखला कब्जा गरेको हो ।

टस हारेर पहिले ब्याटिङ गरेको अष्ट्रेलियाले ग्लेन म्याक्सवेलको शतकको मद्दतमा ४ विकेट गुमाएर २४१ रनको विशाल योगफल जोडेको थियो । म्याक्सवेलले ५५ बल खेल्दै १२ चौका र ८ छक्का मद्दतमा १२० रनको अविजित इनिङ खेलेका थिए । यो म्याक्सवेलको अन्तराष्ट्रिय टि-२० मा पाँचौं शतक हो । रोहित शर्माले पनि पाँच शतक बनाएका छन् ।

टीम डेविड १४ बलमा २ चौका र २ छक्का सहित ३१ रनमा नटआउट रहे । यस्तै मिचेल मार्शले १२ बलमा ३ चौका र २ छक्का सहित २९ रन बनाए ।

वेस्ट इन्डिजका जेसन होल्डरले २ तथा अल्जारी जोसेफ र रोमारियो सेफर्डले समान एक एक विकेट लिए ।

विशाल लक्ष्य पछ्याएको वेस्ट इन्डिजले २० ओभर खेल्दै ९ विकेटको क्षतिमा २०७ रन बनायो । वेस्ट इन्डिजका कप्तान रोभ्मन पावेलले ३६ बलमा ५ चौका र ४ छक्कासहित सर्वाधिक ६३ रन बनाए । यस्तै आन्द्रे रसेए १६ बलमा ३७ रन जोडे । जेसन होल्डरले २८ तथा जोन्सन चार्ल्सले २४ रन बनाए ।

अष्ट्रेलियाका लागि मार्कस स्टोईनिसले ३ तथा जोश हेजलवुड र स्पेन्सर जोन्सनले समान २-२ विकेट लिए । जेसन बेहरनडोर्फ र एडम जाम्पाले १-१ विकेट लिए ।

शृंखलाको तेस्रो खेल मंगलबार हुनेछ ।