काठमाडौं (हाम्रो खेलकुद) – नेपाली राष्ट्रिय क्रिकेट टोलीका कप्तान रोहित पौडेल र यू१९ कप्तान देव खनालले क्यानडाविरुद्ध दोस्रो ओडीआईमा अर्धशतक पूरा गरेका छन् ।

कीर्तिपुरस्थित टियु क्रिकेट मैदानमा शनिबार क्यानडाविरुद्ध जारी दोस्रो ओडीआईमा २ सय ८६ रनको लक्ष्य पछ्याउने क्रममा रोहित र देवले अर्धशतक बनाउँदै इनिङ सम्हालेका हुन् । तेस्रो विकेटका लागि देव र रोहितले शतकीय साझेदारी पनि पूरा गरेका छन् ।

देवले ५६ बलमा अर्धशतक पूरा गरे । उनले ४ चौका र २ छक्का प्रहार गरे । रोहितले ६७ बलमा ४ चौका र ३ छक्का प्रहार गरेका हुन् । नेपालले २८ औं ओभरमा २ विकेट गुमाउँदै १ सय ६८ रन जोडेको छ । रोहित ५० र देव ५३ रनमा खेलिरहेका छन् ।

त्यसअघि ओपनर अनिल शाहले ओडीआई क्रिकेटमा नेपालका लागि सबैभन्दा तीव्र अर्धशतक प्रहार गरेका थिए । अनिलले १९ बलमा अर्धशतक पूरा गरे । उनले आसिफ शेखले पिएनजीविरुद्ध गत वर्ष २१ बलमा अर्धशतक बनाएको कीर्तिमान तोडेका हुन् ।

अनिल अर्धशतक पूरा गरेको अर्को बलमा आउट भए । उनी इश्वरजोत सोहिको एलबीडब्लु धरापमा परे । २० बलमा ७ चौका र ३ छक्कासहित अनिलले ५० रन जोडेका थिए ।

त्यसअघि पाँचौ ओभरको अन्तिम बलमा आसिफ शेख आउट भएका थिए । उनी १६ बलमा १० रन जोड्दै सोहिकै बलमा क्याच आउट भए । पहिलो विकेटका लागि ५५ रनको साझेदारी गरेपछि नेपालले लगातार २ विकेट गुमाएको हो ।

नेपाल ८ ओभरमा ६५ रन जोडेर खेलिरहेको छ । क्रिजमा कप्तान रोहित पौदले र देव खनाल १-१ रनमा छन् ।

नेपाल सिरिज जितका लागि २ सय ८६ रनको लक्ष्य पछ्याइरहेको छ । क्यानडाले ५० ओभरमा ९ विकेट गुमाउँदै २ सय ८५ रन जोडेको थियो ।